SUA yatoa Tuzo 242 kwa washindi 205 waliong'ara katika Taaluma, Uongozi na Utafiti

Na Calvin Gwabara – Morogoro

Chuo Kikuu cha Sokoine cha Kilimo (SUA) kimetoa jumla ya tuzo 242 kwa washindi 205 waliobobea katika taaluma, utafiti na uongozi, huku tuzo hizo zikitolewa kwa msaada wa wafadhili 56 katika hafla ya 43 ya utoaji wa tuzo iliyofanyika leo katika Kampasi ya Edward Moringe, Morogoro.

Baadhi ya wahitimu wakifuatilia hafla ya zoezi la utoaji wa tuzo hizo.

Akizungumza katika hafla hiyo, Mgeni Rasmi ambaye ni Naibu Katibu Mkuu wa Wizara ya Mifugo na Uvuvi, Dkt. Fabian Magawa Madele, aliwataka wanafunzi waliotunukiwa tuzo kutotazama mafanikio hayo kama mwisho wa safari yao, bali kama mwanzo wa majukumu na fursa kubwa zaidi katika maisha yao ya kitaaluma na kikazi.

Aidha amesema tuzo hizo ni matokeo ya bidii, nidhamu, uvumilivu, utafiti na kujituma, hivyo zinapaswa kuwahamasisha washindi kuongeza juhudi zaidi.

Dkt. Madele, ambaye aliwahi kuwa mwanafunzi wa SUA kati ya mwaka 1995 na 2000 akisomea Shahada ya Udaktari wa Mifugo, amesema kurejea chuoni hapo kama kiongozi wa Serikali kwake ni zaidi ya hafla na Heshima kwakuwa SUA imekuwa msingi wa elimu na taaluma yake huku akiwataka wahitimu na wanafunzi kutumia maarifa waliyoyapata kwa manufaa ya jamii na Taifa, huku wakizingatia ubunifu, uadilifu na uwajibikaji.

“Kuwa bora, kuwa wabunifu, kuwa na nidhamu, kuwa watu wa uadilifu na, zaidi ya yote, tumieni maarifa yenu kuitumikia jamii na kujenga Taifa letu lakini nisisitize mafanikio ya kitaaluma yanapaswa kuambatana na matumizi ya maarifa katika kutatua changamoto za jamii na kuchangia maendeleo ya Tanzania,” alisema Dkt. Madele.

Kwa upande wake, Makamu Mkuu wa SUA, Prof. Raphael T. Chibunda, alisema tuzo 242 zilizotolewa mwaka huu zinajumuisha tuzo 214 za taaluma, 23 za uongozi na tano za utafiti, huku wanafunzi 45 wakifanikiwa kupata tuzo zaidi ya moja huku tuzo 18 zimetolewa kwa washindi zaidi ya mmoja, jambo linaloonyesha upana wa mafanikio yanayotambuliwa na Chuo hicho.

Prof. Chibunda amesema SUA imeendelea kuweka mkazo mkubwa katika utafiti na ubunifu kama sehemu ya utekelezaji wa dhamira yake ya kuzalisha maarifa yanayochangia maendeleo na katika hafla hiyo watafiti watano walitambuliwa kwa kazi zao za utafiti zilizoonyesha ubora wa kipekee na mchango katika kuongeza maarifa na maendeleo, huku pia wanafunzi viongozi waliopatikana kupitia mchakato wa uwazi na kidemokrasia wakitunukiwa kwa uongozi wao bora.

Aidha, Prof. Chibunda amesema Chuo kinaendelea kutambua ubora wa kitaaluma kupitia tuzo mbalimbali, ikiwemo Tuzo kwa wanafunzi bora yaw a Uzamili “Convocation Prize for the Best Master’s Student” iliyoanzishwa mwaka 1989 kwa ajili ya kumtambua mwanafunzi bora wa Shahada ya Uzamili.

Aidha amefafanua kuwa tuzo hiyo ina vigezo vigumu, ikiwemo kuwa na wastani wa alama (GPA) wa 4.0 au zaidi, kumaliza masomo yote SUA na kukamilisha na kuwasilisha tasnifu ndani ya miaka miwili.

“Hafla hii ni fursa ya kutambua na kusherehekea wanafunzi na watumishi waliojitofautisha katika ubora wa kitaaluma, uongozi na utafiti, na pia kuhamasisha jumuiya nzima ya Chuo kufikia viwango vya juu zaidi vya utendaji na mafanikio,” alisema Prof. Chibunda.

Amesema mafanikio hayo yanafanyika wakati SUA ikiendelea kutekeleza mpango mkakati wa Chuo kwa lengo la kuimarisha ushindani wake na kujenga mazingira yatakayowawezesha wanafunzi na watumishi kutumia uwezo wao kikamilifu.

Akizungumza wakati akimkaribisha Makamu mkuu wa Chuo, Naibu Makamu Mkuu wa Chuo Taaluma, Utafiti na Ushauri wa Kitaalamu, Prof. Maulid Mwatawala amesema hafla hiyo hufanyika kila mwaka kabla ya mahafali kwa lengo la kutambua wanafunzi waliofanya vizuri katika masomo yao pamoja na watumishi walioonyesha ubora katika taaluma, hususan kupitia tafiti zenye tija kwa jamii na taifa.

Prof. Mwatawala amesema kwa kuwa wanafunzi na watumishi wote wanafanya vizuri katika majukumu yao lakini tuzo hizo hutolewa kwa wale waliofanya vizuri zaidi, jambo linalolenga kuwahamasisha wengine kuongeza juhudi katika masomo na utendaji wa kazi.

“Pamoja na upande wa taaluma lakini pia tuzo hizi zilitolewa pia kwa viongozi wa Serikali ya Wanafunzi (SUASO) kutokana na mchango wao katika kipindi cha mwaka mzima wa masomo, hususan katika kuimarisha ushirikiano kati ya wanafunzi, uongozi wa Chuo na walimu kwani viongozi hao wamekuwa kiungo muhimu katika kufikisha na kusikiliza masuala yanayowahusu wanafunzi”Alisema Prof. Mwatawala.

Aidha amesema kuwa mafanikio ya tukio hili la utoaji wa tuzo hayategemei Chuo pekee bali pia ushirikiano wa taasisi, mashirika na watu binafsi wanaochangia zawadi mbalimbali kwa wanafunzi na wanataaluma na hivyo amewashukuru wafadhili 56 waliowezesha tuzo hizo kwani mchango wao unasaidia kujenga utamaduni wa ubora na kuwahamasisha wanafunzi na watafiti kufanya vizuri zaidi.

Akitoa shukrani kwa mgeni rasmi kabla ya kuhitishwa kwa tukio hilo Naibu makamu makuu wa Chuo Upande wa Utawala Fedha na Mipango Prof. Amandus Muhairwa amemshukuru mgeni rasmi kwa kutenga muda wake kuja kujumuika na Chuo kwenye hafla hiyo pamoja na kuwa na majukumu mengi ya kitaifa.

Amepongeza juhudi kubwa zilizofanywa na wanwake kwenye tuzo za mwaka huu hasa baada ya kuonekana tuzo nyingi kuchukuliwa na wanawake na hivyo kutoa changamoto kwa viojana wa kiume kuona namna ya kuongeza juhudi kwenye masomo yao badala ya kukaa na kuchwa nyuma kwenye masomo.

Hafla hiyo imefanyika ikiwa ni siku moja kabla ya Mahafali ya 48 ya SUA yanayotarajiwa kufanyika kesho, ambapo jumla ya wanafunzi 3,309 kutoka programu 69 wanatarajiwa kutunukiwa shahada mbalimbali.

MATUKEO KATIKA PICHA WAKATI WA ZOEZI HILO LA UTOAJI WA TUZO.

Naibu Katibu Mkuu wa Wizara ya Mifugo na Uvuvi, anayeshughulikia Mifugo Dkt. Fabian Magawa Madele akizungumza kabla ya kuanza kutoa zawadi kwa wahitimu.