SUA yalenga kuzalisha Wataalamu watakaongoza mageuzi kwa Sayansi na Ubunifu katika kutatua changamoto za Taifa

 Na: Calvin Gwabara - Morogoro.

Chuo Kikuu cha Sokoine cha Kilimo (SUA) kimeendelea kuimarisha nafasi yake katika elimu ya juu, utafiti na ubunifu, huku kikizindua hatua mbalimbali za kimkakati zinazolenga kuongeza mchango wa Chuo katika maendeleo ya Taifa.

Mkuu wa Chuo Kikuu cha Sokoine cha Kilimo SUA Mhe. Jaji Mkuu mstaafu Joseph Sinde Warioba akimtunuku mmoja wa wahitimu wa shahada ya Uzamivu kwenye mahafali hayo ya 48 ya Chuo Mkoani Morogoro.

Akizungumza katika Mahafali ya 48 ya SUA Makamu Mkuu wa Chuo, Prof. Raphael  Chibunda, amesema Chuo kinaendelea kupata mafanikio katika utekelezaji wa jukumu lake la kuandaa wataalamu na kuongeza nguvu kazi yenye ujuzi kwa ajili ya maendeleo ya Taifa.

“Tunayo sababu ya kujipongeza kwa mafanikio yanayoendelea kupatikana katika Chuo chetu mwaka hadi mwaka hususan katika kutekeleza jukumu letu la kuandaa wataalamu na kuongeza nguvu kazi yenye ujuzi kwa ajili ya maendeleo ya Taifa,” alisema Prof. Chibunda.

Prof. Chibunda amesema mahafali hayo yamewakutanisha wahitimu 3,309 kutoka programu 69, wakiwemo wanaume 1,774 na wanawake 1,535. Kati yao, wahitimu wa Shahada za Kwanza ni 3,156, Shahada za Umahiri 62, Shahada za Uzamivu 22, Stashahada za Uzamili wanne, Stashahada 60 na Astashahada watano.

Kwa mujibu wa Makamu Mkuu huyo SUA imeanza kutekeleza hatua kadhaa muhimu chini ya Mpango Mkakati wa Chuo wa mwaka 2026–2031, ikiwemo kuanzishwa kwa programu mpya tano zilizoidhinishwa na Tume ya Vyuo Vikuu Tanzania (TCU), huku Chuo kikiendelea pia na utekelezaji wa Mradi wa Elimu ya Juu kwa Mageuzi ya Kiuchumi (HEET) kwa ajili ya kuimarisha miundombinu na mazingira ya kujifunzia na kufundishia.

Katika eneo la utafiti, Prof. Chibunda amesema SUA inaendelea kutekeleza miradi 116 ya utafiti katika maeneo mbalimbali nchini, ikiwa na lengo la kuzalisha maarifa, teknolojia na ubunifu na kutoa suluhisho kwa changamoto za kijamii na kiuchumi zinazolikabili Taifa na kwamba zaidi ya watumishi 226 wako katika mafunzo ya umahiri na uzamivu ndani na nje ya nchi, hatua inayolenga kuongeza ujuzi na weledi wa Chuo.

Akizungumzia hatua nyingine za kimkakati, Prof. Chibunda amesema SUA imeanza shughuli za Kampuni ya Uzalishaji Mapato na Huduma za Chuo inayolenga kuongeza vyanzo vya mapato na kuimarisha uwezo wa Chuo kujitegemea kifedha.

Makamu huyo wa Mkuu wa Chuo amesema Chuo kimepata idhini ya Baraza la Vyuo Vikuu vya Afrika Mashariki (IUCEA) kuendesha programu ya kikanda ya Shahada ya Umahiri ya Sayansi katika Uhandisi na Usimamizi wa Umwagiliaji, hatua inayokiimarisha SUA kama kitovu cha kikanda cha kuzalisha wataalamu wa umwagiliaji.

Kwa upande wake Mwenyekiti wa Baraza la SUA, Mhe. Andrew  Massawe, amesema Baraza limeendelea kusimamia Chuo kwa kuzingatia misingi ya weledi, uadilifu na uzalendo, huku likisisitiza matumizi sahihi ya rasilimali na kuimarisha vyanzo vya mapato ya ndani kupitia miradi ya kibiashara, huduma za ushauri na uwekezaji wa kimkakati. 

“Baraza la Chuo limeendelea kutekeleza majukumu yake kwa weledi, uadilifu na uzalendo, likiwa na lengo kuu la kuhakikisha kwamba SUA inaendelea kuwa taasisi mahiri ya elimu ya juu, utafiti na utoaji wa huduma bora kwa jamii,” alisema Mhe. Massawe.

Aidha ameongeza kuwa katika kipindi cha Julai hadi Septemba 2026, Chuo kilitekeleza kwa wastani wa asilimia 80 ya shabaha zilizopangwa, huku jumla ya Sh. bilioni 125.775 zikitumika katika utekelezaji wa shughuli mbalimbali.

“Baraza linaendelea kusimamia Mradi wa HEET wenye thamani ya zaidi ya Sh. bilioni 62.776, unaohusisha ujenzi wa majengo manane katika kampasi za Mizengo Pinda, Edward Moringe na Solomon Mahlangu, yakiwemo mabweni, kumbi za mihadhara na maabara za mafunzo kwa vitendo” alisema Mhe. Massawe.

Mwenyekiti huyo wa Baraza la Chuo pia amesema Baraza limeidhinisha kuanzishwa kwa Taasisi ya Mabadiliko ya Tabianchi na Bioanuai, inayolenga kuimarisha tafiti na ubunifu katika kukabiliana na changamoto za mazingira lakini pia Baraza hilo limeidhinisha Mpango Mkakati wa Sita wa SUA wa 2026–2031 pamoja na sera mbalimbali za TEHAMA, elimu mtandao, usimamizi wa kumbukumbu na utoaji huduma na ushirikishwaji wa jamii.

Katika eneo la elimu, Massawe amesema maboresho ya mitaala yamefanywa ili kuhakikisha programu za SUA zinaendana na mahitaji ya soko la ajira, maendeleo ya sayansi na teknolojia pamoja na mahitaji ya sekta za uzalishaji na kwamba asilimia 20 ya mafunzo itatolewa na wataalamu kutoka sekta za uzalishaji na viwanda, huku TCU ikiwa tayari imeidhinisha mitaala mipya 111 ya kimkakati kuanza kutumika katika mwaka wa masomo 2026/2027.

Katika nasaha zake kwa wahitimu Mhe. Massawe amewataka kutumia elimu waliyoipata kubadilisha changamoto kuwa fursa, na kuwa wabunifu katika kilimo, ufugaji, teknolojia na ujasiriamali badala ya kutegemea ajira pekee. 

“Tumieni elimu mliyoipata kugeuza mawazo kuwa suluhisho, changamoto kuwa fursa na ndoto kuwa mchango wenye maana kwa jamii huku mkihakikisha mnakuwa kizazi kinachoongoza mageuzi kupitia sayansi, teknolojia na ubunifu na mzingatie kuwa  thamani ya elimu yenu itapimwa zaidi kwa matokeo mtakayoacha katika maisha ya watu na maendeleo ya Taifa” alisisitiza Mwenyekiti wa Baraza la Chuo Mhe. Massawe.

Awali akizungumza kuhsu sherehe za mahafali kabla ya kuanza rasmi mahafali hayo “MLAU” wa SUA Prof. Kalunde Sibuga amesema chimbuko la mahafali lilianzia huko ulaya baada ya kuanzishwa kwa vyuo vikuu katika karne ya 12 hasa baada ya vyuo vikuu vya kwanza kuanishwa na Makanisa.

“Viongozi hao wa makanisa ndio walikuwa viongozi wakuu wa vyuo hivyo na katika kusherehekea upevukaji wa wanafunzi hao yaani kuhitimu masomo walifanya sherehe na sherehe hiyo ndio Mahafali ili kuwatunuku vyeti na ishara ya mamlaka ya kutunuku ni ile Rungu  “SIWA” ikiwa ni ishara ya wewe Mkuu wa Chuo Kutunuku vyeti na sio mtu mwingine” alieleza Prof. Sibuga.

Aliongeza “Sherehe za Mahafali zinakwenda sambamba na vazi maalumu na kwa kuzingatia kuwa vyuo vya kwanza vilianzishwa na Makanisa na kama mjuavyo mavazi ya wakuu wa makanisa ni Kanzu za aina mbalimbali hivyohivyo wahitimu wameendela kutumia vazi hilo ambalo sasa tunaita Majoho kama kanzu za iana fulani fulani zinazotofautiana kwa miraba na kofia na kamba ambazo zinatakiwa kuwa kushoto kabla ya kutunukiwa”.

          MATUKIO KATIKA PICHA WAKATI WA MAHAFALI HAYO YA SUA.

Mwenyekiti wa Baraza la Chuo Mhe. Andrew W. Massawe akitoa salamu za Baraza kwenye mahafali hayo.  

MLAU wa SUA Prof. Kalunde Sibuga akitoa maelezo ya awali ya maana ya mahafali na historia yake kwa wahitimu, Familia na wadau wa mahafali hayo.