SUA FM yatajwa kuwa nyenzo muhimu ya kuboresha kilimo kwa wakulima wa Mvomero

 Na: Vumilia Kondo

Katika ulimwengu wa sasa ambapo teknolojia inakua kwa kasi, redio bado imebaki kuwa nyenzo imara na ya gharama nafuu katika kufikisha maarifa ya kilimo kwa wakulima vijijini kutokana na uwezo wake wa kuvuka vikwazo vya elimu na gharama.

Hili limethibitishwa na utafiti  uliofanywa na Calvin Gwabara, mwanafunzi wa Shahada ya Uzamili ya Taarifa na Menejimenti ya Maarifa kutoka Chuo Kikuu cha Sokoine cha Kilimo (SUA), aliyemulika mchango wa redio ya jamii ya SUA FM katika Wilaya ya Mvomero mkoani Morogoro.

Utafiti huo umehusisha wakulima 204 kutoka kata za Mlali, Wami-Dakawa, na Mzumbe, umebaini kuwa redio hiyo ni chanzo kikuu cha habari ambacho kimebadilisha mfumo wa kilimo kwa kiasi kikubwa kupitia maudhui yanayozingatia utafiti wa kisayansi na ushauri wa kitaalamu.

Matokeo ya utafiti huo yameonesha takriban asilimia 91.6 ya wakulima walikiri kuwa mbinu zao za ulimaji zimeboreka kupitia vipindi vya SUA FM.

"Uchambuzi umeonesha kuwa asilimia 91.6 ya wakulima walikiri kuwepo kwa maboresho katika mbinu zao za kilimo kutokana na vipindi vya SUA FM, hususan katika mbinu za ukuzaji wa mazao, matumizi ya mbegu bora, utabiri wa hali ya hewa, na udhibiti wa wadudu, amesema Gwabara.

 Aidha, zaidi ya asilimia 80 ya wakulima wameonesha kuridhishwa na maudhui yanayotolewa, huku wengi wao wakieleza kuwa habari hizo huwafikia kwa wakati mwafaka kulingana na kalenda ya msimu wa kilimo.

Pamoja na mafanikio hayo, utafiti umeibua tofauti za kundi la wasikilizaji ambapo wakulima vijana wameonekana kuitegemea zaidi redio hiyo kama chanzo chao kikuu cha maarifa.

Hata hivyo, Gwabara amebainisha kuwa kuna changamoto zinazokwamisha ufanisi kamili wa redio hiyo katika kuleta mageuzi ya kilimo, hasa kutokana na kukosekana kwa baadhi ya taarifa muhimu za kiuchumi.

"Licha ya SUA FM kuwa chanzo kikuu, utafiti ulibaini kuwepo kwa mapengo ya habari katika maeneo ya mikopo ya kilimo, upatikanaji wa masoko, na usimamizi wa mazao baada ya kuvuna, mambo ambayo yamepunguza ufanisi wa jumla kwa mkulima mmoja mmoja," amesema Gwabara.

Changamoto nyingine zilizotajwa ni pamoja na usikivu mdogo wa mawimbi ya redio katika maeneo ya pembezoni na muda mfupi wa matangazo ambao wakati mwingine hauendani na nafasi ya mkulima akiwa nyumbani.

Ili kuifanya SUA FM kuwa injini kamili ya mabadiliko, utafiti huo umependekeza kuwa watayarishaji wa vipindi wanapaswa kutanua wigo wa maudhui yao kwa kujumuisha habari za kina kuhusu mikopo, masoko, na teknolojia mpya za kisasa ili kuwavutia wasikilizaji wa rika zote.

"SUA inapaswa kuimarisha usikivu wa mawimbi ya redio kwa kuboresha miundombinu ya urushaji matangazo katika maeneo ya mbali ya Mvomero ambapo utafiti umebaini kuwa usikivu ni changamoto kubwa."

Pia, ameshauri kutolewa kwa  ratiba za vipindi mara kwa mara na kuvirudia nyakati za jioni ili kuhakikisha kila mkulima anapata fursa ya kujifunza na kuboresha tija katika uzalishaji wa mazao kama mahindi, mpunga, na mbogamboga.