Wanafunzi wanaofadhiliwa wametakiwa kuzingatia masomo ili wahitimu kwa wakati

 

Na: George Alexander

Wito umetolewa kwa wanafunzi nchini wanaonufaika na ufadhili mbalimbali wa masomo kuzingatia na kuheshimu masomo yao pamoja na ufadhili wanaoupata ili waweze kuhitimu masomo yao kwa wakati.

Wito huo umetolewa na Makamu Mkuu wa Chuo Kikuu cha Sokoine cha Kilimo (SUA) Prof. Raphael Chibunda wakati akizungumza na wanafunzi wanufaika wa ufadhili wa masomo wa mradi wa Climate Action Network Tanzania (CAN) kwenye warsha iliyofanyika SUA na kuwakutanisha wanafunzi kutoka vyuo mbalimbali nchini.

Prof. Chibunda amewataka wanafunzi kusoma kwa bidii na kuwa na nidhamu na pia kujiheshimu ili kuweza kuthamini mchango walioupata kwa wafadhili wa masomo yao na kuwawezesha kumaliza kwa muda uliopangwa.

“Niwapongeze sana utaratibu wa ufadhili wa SAMIA Scholarship kwa utaratibu waliojiwekea kwa mwanafunzi asipofikisha ufaulu wa GPA ya 3.8 ufadhili wake unasitishwa  na kupewa mtu mwingine katika Chuo hicho hicho, hii inapelekea mwanafunzi kusoma kwa bidii”, amesema Prof Chibunda.

Aidha Prof. Chibunda amewapongeza CAN kwa kuwa wazalendo wa kutafuta pesa kwa wafadhili mbalimbali na kuamua kuzileta nchini na kusaidia wanafunzi wa Kitanzania ambao asilimia kubwa hushindwa kutimiza ndoto zao kwa kukosa mahitaji muhimu ya shule.

Dkt. Sixbert Mwanga ambaye ni Mtafiti na Mkurugenzi wa Shirika la CAN amevitaja vigezo mbalimbali vilivyotumika kuwapata wanufaika hao ikiwa ni pamoja na kupitia Ofisi ya Taifa ya Takwimu ambayo imebainisha mikoa maskini, lakini pia wanafunzi ambao hawana ufadhili wa Serikali (BOOM) na kutumia fomu mbalimbali kwenda kwa wenyeviti wa vijiji na watendaji pamoja na kuhitaji wanafunzi ambao wanasoma masomo yenye tija vijijini mfano kilimo, ufugaji, utalii wa vijijini.

“Tumeingia mkataba na wanafunzi na kila mwaka watakuwa wanajaza mkataba mpya na pia tutafuatilia maendeleo ya mwanafunzi kwa kutumia matokeo yake lakini pia kufuatilia maendeleo yake kupitia kwa wakuu wa idara na hii itatufanya tujue kama mwanafunzi ataendelea na ufadhili au tumsitishie na tumpe mtu mwingine”, amesema Dkt Sixbert.

Naye Mwenyekiti wa Bodi ya Wakurugenzi wa CAN ambaye ni Mhadhiri Mwandamizi wa Chuo Kikuu cha Dar Es Salaam Dkt. Catherine Aloyce Masao amesema wanafunzi wengi wa kitanzania wanapenda kusoma lakini wengi wao hushindwa kutokana na kukosa mkopo wa Serikali au mashirika binafsi.

“Idadi ya wanafunzi 36 kati ya 300 walioomba wamepata nafasi kupitia tangazo tulilolitoa kwa mwezi mzima huku wasichana wakiwa idadi kubwa na sio kwa upendeleo bali kwa vigezo walivyokidhi, na sio Tanzania Bara tu hadi wanafunzi wa Tanzania Visiwani tumewachukua”, amesema Dkt. Catherine

Mwanafunzi mmoja wapo ambaye ni mnufaika wa ufadhili huo anayesoma Udaktari wa Mifugo mwaka wa nne Ampelius Anthony amesema safari yake ya elimu mpaka kufikia hapo ilikuwa ni ya kusuasua kwani alilazimika  kuwahusisha viongozi wa Chuo na wakati mwingine kuchangiwa karo.

“Binafsi niushukuru uongozi wa SUA kwa kututangazia kila fursa inayokuja hususani inayohusu ufadhili wa masomo nina ahidi kuwa na juhudi na kuweza kutimiza ndoto yangu ili niweze kusaidia jamii”, ameeleza Ampelius

Mikoa ambayo wanafunzi wake wataweza kunufaika na ufadhili wa masomo unaotolewa na CAN Tanzania ni Kagera, Shinyanga, Singida, Lindi, Manyara, Mtwara, Mara, Morogoro, Unguja ambapo wanafunzi watakaopata ufadhili huo ni wale wa kuanzia ngazi ya Cheti, Astashahada, Shahada ya Kwanza na Shahada ya Uzamili.