Walimu wanafunzi SUA wametakiwa kulinda heshima ya taaluma ya ualimu

 Na: Ayoub Mwigune   

Walimu wanafunzi wa Chuo Kikuu Cha Sokoine Cha Kilimo (SUA) wametakiwa kuthamini na kulinda heshima ya taaluma ya ualimu huku wakijituma kufanikisha ndoto zao kwa vitendo. 

Hayo yamesemwa na Katibu wa Chama cha Walimu Mkoa wa Morogoro, Alphonso Benedict, katika hafla ya Siku ya Walimu Wanafunzi SUA, iliyofanyika kwa mara ya kwanza chuoni hapo.

Akizungumza katika hafla hiyo, Bw. Benedict amewataka wanafunzi hao kutoidhalilisha taaluma hiyo pale watakapopata nafasi za ajira. 

"Taaluma ya ualimu ni msingi wa taaluma nyingine zote, na sisi kama chama cha walimu tuko kwa ajili ya kuhakikisha haki zenu zinalindwa, lakini ni muhimu kila mmoja wenu kuwa mfano wa kuigwa na kuonyesha maadili bora katika taaluma hii muhimu," amesema Bw. Benedict. 

Kwa upande wake, Naibu Makamu Mkuu wa Chuo Taaluma Utafiti na Ushauri wa Kitaalamu SUA Prof. Maulid Mwatawala, aliyewakilishwa na Dkt. Geoffrey Karugila, Rasi wa Ndaki ya Solomon Mahlangu, ameeleza  umuhimu wa walimu wanafunzi kujituma katika masomo yao.

"Chuo kina matarajio makubwa kwenu, mnalo jukumu la kuhakikisha mnajituma, kujifunza, na kuwa walimu bora mnaoweza kubadilisha maisha ya vijana wengi kwa kuwaandaa kufanya vizuri katika nyanja mbalimbali za sayansi," amesema Dkt. Karugila.

Aidha, Dkt. Karugila ameeleza  kuwa SUA inaamini walimu wanafunzi hao watatumia maarifa wanayoyapata chuoni hapo kusaidia kukuza taaluma ya sayansi na kuchangia maendeleo ya jamii kwa ujumla. 

Naye Amidi wa Shule Kuu ya Elimu SUA Prof. Jamal Jumanne, amesema kuwa tukio hilo limekuwa la mafanikio makubwa na ni la kihistoria kwa chuo hicho.

"Hili ni tukio la kwanza kufanyika SUA, na tumepata nafasi ya kujadili mwelekeo wa taaluma, kukuza ushirikiano, na kusikiliza mada muhimu kutoka kwa wanataaluma wa ndani na nje ya chuo," amesema Prof. Jamal

Prof. Jumanne ameongeza kwa kusema kuwakuwa taaluma ya ualimu ni taaluma mama, kwani kupitia taaluma hii taaluma nyingine zote hupatikana huku akiwataka walimu  wanafunzi kuhakikisha wanakuwa mfano bora kwa jamii na kutumia fursa walizopewa kukuza maisha yao na yale ya wengine.

Kwa upande wake Buganzi Dastan ambaye ni Mwenyekiti  wa Jumuiya ya Walimu Wanafunzi wa Masomo ya  ya Sayansi SUA   SUASSTTO  amesema Hafla hiyo, ilmelenga kuwakaribisha walimu-wanafunzi wa mwaka wa kwanza wa masomo ya 2024/2025 na kuwapa maarifa ya ziada sambamba na kushiriki kwa pamoja katika michezo mbalimbali.