Wajasiriamali wanaotengeneza mvinyo waipongeza SUA kwa mafunzo yenye tija

 Na: Farida Mkongwe

Baadhi ya wakulima wa zabibu na wajasiriamali wanaotengeneza mvinyo jijini Dodoma wamekishukuru Chuo Kikuu cha Sokoine cha Kilimo (SUA) chini ya Mradi wa Elimu ya Juu kwa Mageuzi ya Kiuchumi (HEET) kwa kuandaa mafunzo ya vitendo juu ya utengenezaji mvinyo bora ambayo wanakiri yataongeza thamani katika Mvinyo wanaotengeneza.

Wakizungumza na SUA Media Desemba 4, 2024 mara baada ya kujifunza kwa vitendo namna ya kutengeneza mvinyo bora katika Kiwanda cha Utengenezaji Mvinyo cha Alko Vintage (Dodoma) wakulima hao akiwemo Bw. William Swai kutoka Hombolo, Bw. Steven Barie kutoka Mradi wa Zabibu na BBT Chinangali, Bi. Gloria Shayo kutoka Mvumi na Bw. Innocent Njau kutoka Mkonze wamesema mafunzo hayo yamewaongezea utambuzi wa namna ya kuandaa mvinyo mzuri wenye ubora wa kimataifa.

“Nafurahi na kuishukuru SUA kwa sababu mafunzo ya mwezi June, 2024 yalitupa ufahamu tu wa jumla, lakini leo hapa kiwandani tumeona mashine na vifaa mbalimbali vinavyotumika kusindika mvinyo, hii inatuhamasisha kufikia hatua hizi”, amesema Bw. Swai ambaye anaomba Serikali iwasaidie kurahisisha upatikanaji wa vifaa bora vya kutengeneza mvinyo bora.

“Kupitia mafunzo haya naamini nitawasaidia watu wa Chinangali hasa kwenye mradi wa zabibu tutashirikiana na wataalamu wenzangu katika kuhakikisha tunazalisha zabibu iliyo bora na kutengeneza mvinyo katika kiwango chenye ubora wa juu ambacho tumejifunza kupitia SUA”, amesema Bw. Barie.

Bi. Gloria amewataka wanawake kuingia kwenye sekta ya viwanda vidogo vidogo vya utengenezaji mvinyo kwa kuwa ni biashara nzuri na yenye faida “mimi najivunia SUA na nawashukuru sana kwani awali nilikuwa sijui vitu vingi lakini kwa sasa hata wateja wameongezeka maana nimejifunza misingi muhimu ya uzalishaji zabibu likiwemo suala la usafi.

Naye Bw. Njau ambaye ni mmiliki wa kiwanda cha Pilot Wine amesema kabla ya kupata mafunzo kutoka SUA alikuwa amejikita kufanya utafiti wa kupata masoko ya mvinyo “lakini baada ya kupata mafunzo haya nikapata elimu ya kuweza kutengeneza mvinyo na siyo mvinyo tu bali mvinyo bora na salama”.

Mtengenezaji mvinyo kutoka Kampuni ya Alko Vintages Bw. Archard Kato akitoa mafunzo hayo kiwandani hapo amesema nia yao ni kuboresha mvinyo unaotengenezwa Dodoma ili kulinda nembo ya mvinyo jijini humo, akisema “tumesisitiza misingi ya utengenezaji mvinyo ulio bora na lengo ni kuwafaanya wazalishaji wadogo waelewe umuhimu wa kuwekeza kwenye misingi hiyo, tunajitahidi sana kushiriki kutoa mafunzo kwa sababu inatusaidia kueneza elimu tuliyo nayo,”.

Mtafiti Mwandamizi kutoka TARI MAKUTUPORA Bi. Felista Mpore amesema wameandaa mafunzo hayo ili kuwapa wakulima wa zabibu na watengenezaji wa mvinyo uelewa mmoja wa njia sahihi za usindikaji wa mvinyo kuanzia uchaguzi wa zabibu shambani hadi kwenye kufungasha mvinyo “ tukisema mvinyo wetu huu wa Dodoma uwe na mfanano iwe mvinyo mweupe au mwekundu, watumiaji watakapoonja tu wasema huu mvinyo umetoka Dodoma”.

Kwa upande wake Mtaalamu wa Kilimo kutoka Taasisi ya Elimu ya Kujiendeleza (ICE) SUA Bw. Philipo James amesema mafunzo hayo ni kutimiza moja ya lengo la SUA kupitia Kitengo cha Ugani katika kuhakikisha wanawafikia wakulima na kuwapa elimu bora ya kilimo kwa manufaa yao na taifa kwa ujumla.

Awamu hii ya pili ya mafunzo imewawezesha wazalishaji hao wa mvinyo kupata mafunzo kwa vitendo ambapo katika awamu ya kwanza walipata mafunzo ya nadharia, mafunzo yote hayo yanafanyika chini ya Mradi wa HEET kwa kushirikiana na Taasisi ya Utafiti wa Kilimo (TARI - MAKUTUPORA).