Vijana watakiwa kuitetea Afrika kupitia uandishi wa vitabu

 Na: Adam Maruma

Vijana wasomi wa vyuo vikuu wametakiwa kueleza mambo mazuri yaliyopo barani Afrika kupitia uandishi wa vitabu kwani ndio njia inayoweza kuwakomboa watu wengi kifikra na kuondokana dhana ya utegemezi bila ya misaada kutoka  mataifa ya nje.

 Katibu wa Jumuia ya Wanafunzi wa Elimu ya Juu Tanzania, (TAHLISO) Akilimali Mwasampinde akizindua kitabu anayefuatia kulia kwake ni mwandishi wa kitabu hicho Bw. Gasper Mwita

Hayo yamesemwa na Katibu wa Jumuia ya Wanafunzi wa Elimu ya Juu Tanzania, (TAHLISO) Akilimali Mwasampinde    alipokuwa mgeni rasmi wakati wa uzinduzi wa Kitabu kilichoandikwa na  mwanafunzi wa Chuo Kikuu Mzumbe   Bw. Gasper Mwita Francis chenye anuani ya Fikra Huru za Mwafrika ambacho kinaelezea umuhimu waafrika kujikomboa kifrika katika nyanja za kiuchumi, kisiasa, kiutamaduni na kijamii.

Mwasampinde amesema bara la Afrika lina mambo mengi mazuri  na hakuna mtu ambaye  atatoka  nje ya bara hilo kueleza mambo hayo na ni muda sasa wa vijana waliobahatika kufikia ngazi ya elimu ya juu kutumia maarifa waliyopata vyuoni, kuwaelimisha wenzao fursa zilizopo barani humo na kuzitumia  ili kujikwamua kiuchumi na kifikra.

''Ukiangalia bara hili lina mambo mengi mazuri kuliko mambo ambayo yanaelezwa na mataifa ya magharibi kama vile, vita, njaa, ukame na mengine hivyo ni wakati wa vijana haswa wasomi wa vyuo vikuu kuwaelimisha wananchi kuhusu fursa zilizopo na kuzitumia kujikwamua kiuchumi na kifikra na hakuna atakayetoka nje ya bara hili na kuja kueleza mambo hayo'' amesema Mwasampinde.

Aidha amempongeza mwandishi wa kitabu hicho chenye jina la ''FIKRA HURU ZA MWAFRIKA'' ndugu Gasper Mwita Francis kwa kuweza kuandika kitabu hicho ambacho amesema kinakwenda kufungua mawazo ya watu  kujiamini na kujiamulia mambo yao kwa mustakabali wao na taifa kwa ujumla.

Kwa upande wake mwandishi wa kitabu hicho Gasper Mwita Francis amesema ameandika kitabu hicho ili kuchochea mtazamo huru wa kifikra na  kimapinduzi kwa vijana wa bara la Afrika,  hususani Tanzania na hilo litawezekana endapo watasoma kitabu hicho na kuyafanyia kazi yaliyoandikwa ndani yake.

Ameongeza kuwa fikra huru ni silaha muhimu kwa vijana kuweza kufuata nyayo za wazalendo wataifa hili kama muasisi wa taifa, Hayati Mwl. Julius Nyerere na Waziri Mkuu wa zamani wa Tanzania Hayati Edward Moringe Sokoine ambao walipenda kuona Taifa linasonga mbele kiuchumi hali iliyowafanya kutumia muda wao  mwingi kusoma vitabu vilivyowaongezea ufahamu  wa namna ya kuliongoza taifa katika imani ya kazi kama msingi wa maendeleo.

Amewasihi vijana kujenga utamaduni wa kujisomea vitabu vyenye maarifa mbalimbali ili kuweza kuongeza ufahamu wa mambo mseto  hali itakayo wajengea kujiamini na kuchambua mambo kwa kina hivyo kufanya maamuzi sahihi kwa masilahi yao na taifa  kwa ujumla.

Mwandishi Gasper Francis Mwita ni mwandishi chipukizi ambae   kitabu chake cha Fikra Huru za Mwafrika ni muendelezo wa  kazi yake uandishi wa vitabu kwani amendika vitabu katika nyanja zingine ikiwemo dini, na vitabu vya hamasa ili kuchochea ukuaji wa maendeleo, amani na utulivu nchini.