SUA yazindua mradi wa tathmini ya mapato ya Kaboni

 Chuo Kikuu cha Sokoine cha Kilimo kimezindua mradi wa tathmini ya mapato ya kaboni kama njia endelevu ya uwezeshaji kifedha katika uhifadhi na usimamizi wa misitu ya jamii Tanzania. Uzinduzi huo umefanyika katika ukumbi wa Rafiki Hotel, Mkoani Dodoma na kuwatanisha wadau mbalimbali wa misitu kutoka takribani mikoa tisa ya Tanzania Bara.

Naibu Makamu Mkuu wa Chuo Kikuu cha Sokoine cha Kilimo Taaluma, Utafiti na Ushauri wa Kitaalamu Profesa Maulid Mwatawala akizungumza katika uzinduzi huo

Katika uzinduzi huo uliofanywa na Naibu Makamu Mkuu wa Chuo Kikuu cha Sokoine cha Kilimo Taaluma Utafiti na Ushauri wa Kitaalamu Profesa Maulid Mwatawala amesema kuwa Lengo la mradi huo ni kutathmini ni kwa jinsi gani biashara ya kaboni na bioanuai inaweza kusaidia kutoa mapato  katika kusimamia na kuhifadhi misitu ya jamii ambayo hairuhusiwi kwa uvunaji na kuendelea kupata kipato kwa mtu mmoja mmoja au jamii kwa ujumla bila kuiathiri misitu hiyo, akitolea mfano wilaya ya Tanganyika iliyopo mkoani Katavi kwa kuwa kinara katika biashara hiyo ya kaboni.

Aidha Prof Mwatawala ameongezea kusema kuwa SUA kama mdau mkubwa wa mazingira itaendelea kushirikiana na serikali pamoja na wananchi kwa kuwawezesha kupata elimu bora ya utunzaji wa mazingira na kupelekea wananchi kunufaika kupitia misitu. Sambamba na hilo amewashukuru watafiti kutoka SUA ambao ni Dr. Kajenje, Dr. Mbeyale na Dr. Lyimo kwakuja na mradi ambao utasaidia uhifadhi endelevu wa misitu na biounuai.

Pia amewashukuru wafadhili wa mradi ambao ni Idara ya Mazingira Chakula na Masuala ya Vijijini ya Uingereza (Department for Environment, Food and Rural Affairs (Defra) of United Kingdom) kwa ushirikiano na Idara ya Kimataifa ya Maendeleo ya Serikali ya Uingereza na Shirika la maendeleo mbadala (Development Alternatives, Inc. (DAI). Na pia amekishukuru Chuo Kikuu cha Bangor cha nchini Uingereza kwa kukubali kushirikiana na watafiti wa SUA kutekeleza mradi huu. Aidha ametoa  shukrani za pekee kwa Rais wa Serikali ya Jamhuri ya Muungano wa Tanzania Dr. Samia Suluhu Hassan kwa kuwa msitari wa mbele kuunga juhudi za Chuo Kikuu cha Sokoine cha Kilimo katika  uhifadhi kwa manufaa ya nchi.

Awali Daktari Kajenje Magessa Nkukurah ambaye ni Mhadhiri wa SUA na mtafiti kiongozi wa mradi alibainisha kuwa lengo la mradi ni kuangalia namna gani wananchi wanaoishi katika maeneo yanayozungukwa na misitu wanaweza kuhifadhi misitu wenyewe bila kuiathiri na kuepusha mabadiliko ya tabia nchi, kutunza bioanuai na kuboresha hali yao ya kimaisha .

Pia alieleza kuwa pato la bionuai  halijafanyiwa utafiti katika nchi yetu lakini linaweza likachangia kwa kiasi kikubwa uhifadhi endelevu katika maeneo ya misitu yenye bioanuai ya kipekee.

Aidha amebainisha kuwa mradi huo utakuwa wa miaka mitatu kuanzia mwaka 2024 mpaka 2027, huku akiainisha mikoa takribani mitano itakayonufaika na mradi huo ikiwemo mikoa ya Manyara, Katavi, Tanga, Kilimanjaro pamoja na mkoa wa Morogoro ambayo ipo Tao la mashariki yenye misitu yenye bioanuai ya kipekee. Na kuongezea kuwa katika mikoa miwili ya Manyara na Katavi tayari wamekwisha anza biashara hiyo ya kaboni hivyo pia watatumika kama wawezeshaji kwenye mikoa mitatu ambayo wana nia kuanza kufanya biashara hiyo.

Pamoja na hayo Dkt Kajenje aalisema kuwa jamii zitakwenda kunufaika moja kwa moja na mradi huu kwa kujengewa uwezo wa namna gani wataweza kunufaika na biashara ya kaboni.

Naye Afisa misitu mkuu Felister Magembe kutoka Ofisi ya Rais Tawala za Mikoa na Serikali za Mitaa (TAMISEMI) amebainisha kuwa ofisi yake inafanya kazi kwa karibu na wananchi. Hivyo itashirikiana na Chuo cha SUA katika kuwawezesha wananchi kupata elimu juu ya utunzaji endelevu wa misitu ili kufanya mikoa hiyo iweze kunufaika. Amesema  kuwa baadhi ya vijiji  ambako kuna miradi ya kaboni  vimenufaika na kuweza kujenga shule, vituo vya afya na barabara kwa kupitia biashara hiyo.

Kwa upande wake Sanura Mshana ambaye ni mwenyekiti wa kamati ya mazingira kata ya Shinghatin Mkoa wa Kilimanjaro ambaye ni mmoja wa washiriki katika Warsha hiyo amesema kuwa mradi huu umekuja wakati muafaka kwakuwa baadhi ya maeneo wananchi wamekuwa wakiharibu mazingira na kuingiza mifugo katika maeneo yaliyohifadhiwa. Hivyo mradi huo utachangia kuleta suluhu katika uhifadhi wa misitu iliyo maeneo yenye bioanuai ya kipaumbele Tanzania (Biodiversity hotspots)