SUA yafundisha ufugaji wa Samaki

Na: George Joseph

Chuo Kikuu cha Sokoine cha Kilimo (SUA) kupitia Taasisi ya Elimu ya kujiendeleza (ICE) kimeandaa mafunzo ya ufugaji bora wa Samaki utakao husisha wafugaji kutoka mikoa mbalimbali nchini ili kujifunza namna bora ya kufuga Samaki kitaalamu.

Mkurugenzi wa Taasisi ya Elimu ya Kujiendeleza Dkt Devotha Mosha (katikati) akiwa katika picha ya pamoja na wafugaji na wakufunzi wa mafunzo ya ufugaji wa Samaki kulia waliokaa ni Dk. Renalda Munubi Mhadhiri Mwandamizi SUA na mkufunzi wa mafunzo hayo.

Akifungua mafunzo hayo ya siku tatu yaliyoanza tarehe 3 Disemba 2024 ya Mkurugenzi wa Taasisi ya Elimu ya Kujiendeleza Dkt Devotha Mosha amesema kuwa mafunzo yatagawanyika katika sehemu mbili darasani kwa nadharia kisha wafugaji watajifunza kwa vitendo na kutembelea eneo la mabwawa ya kufugia Samaki chuoni hapo.

Aidha ameeleza kuwa SUA imeandaa mafunzo hayo kwa lengo la kuwezesha wafugaji kufuga kwa kuzingatia taratibu zote za ufugaji kuanzia kuandaa mabwawa mpaka wakati wa uvunaji na kutaka washiriki hao wawe mfano mzuri katika sekta ya ufugaji wa Samaki nchini.

Pichani ni washiriki katika mafunzo ya ufugaji wa Samaki wakiwa katika mafunzo kwa vitendo.

Dkt Devotha pia ameongeza kuwa Samaki ni kitoweo muhimu sana na pia ni chanzo cha mapato hivyo wafugaji wakipata elimu juu ya ufugaji bora itawawezesha kukuza vipato vyao na kunyanyuka kimaisha.

Aidha washiriki wa mafunzo hayo wamesema kuwa wanategemea kujifunza mengi zaidi wawapo chuoni kwani SUA inasifika nchini kuwa Chuo bora kwenye upande wa kilimo na ufugaji.

Mafunzo hayo ya siku tatu yameanza tarehe 03 Disemba mpaka tarehe 06 disemba 2024 yanashirikisha washiriki zaidi ya 10 kutoka mikoa mbalimbali nchini na yanahusisha wataalam pamoja na wahadhiri mbalimbali kutoa SUA.