SUA kujenga mawazo ya bunifu kwa wanafunzi

 

Na, Winfrida Nicolaus

Chuo Kikuu cha Sokoine cha Kilimo (SUA) kupitia Kitengo cha Uhaulishaji wa Teknolojia kwa kushirikiana na Youth Ignite Student Founders Fellowship (StartHub Africa) kimefanya mafunzo ya kujenga mawazo ya bunifu kwa wanafunzi chuoni hapo, ikiwa ni chachu ya kukuza ajira kwa kupitia biashara binafsi.

Amebainisha hayo Afisa Msimamizi wa Uhaulishaji wa Teknolojia Bi. Lucy Madala wakati akizungumza na SUAMEDIA baada ya mafunzo hayo ambapo amesema kupitia mafunzo hayo wanafunzi wanasaidiwa kuweza kuja na dhana zinazoweza kutekelezwa katika hali halisi za ulimwengu kibiashara hasa kwa kuelewa mahitaji na changamoto zinazoizunguka jamii.

Bi. Lucy amesema mafunzo hayo yamelenga kutatua matatizo au changamoto mahususi kupitia vipindi vya kujadiliana, kuhimiza kufikiri zaidi na kujenga mazingira yanayofaa kwa uzalishaji wa Mawazo kwa ushirikiano katika kuendeleza teknolojia, biashara na uvumbuzi kwenye jamii.

Kwa upande wake Bi. Shakila Mshana Mwanzilishi mwenza na Mkurugenzi Mtendaji wa StartHub Africa amesema Youth Ignite ni programu ambayo imejikita katika kuwawezesha wanafunzi wa vyuoni ambao wana bunifu au biashara zenye uwezo wa kufanikiwa kuingia sokoni na kuwawezesha kujiajiri wao wenyewe lakini pia kutengeneza ajira kwa vijana wengine ili kujikwamua kiuchumi.

Amesema walianza kwa kuchagua vyuo kwa ajili ya kuendesha program hiyo na baadaye katika kila chuo ikiwemo SUA wakafanya zoezi la usajili na kuchagua wanafunzi, makundi au bunifu 30 kwa ajili ya kushiriki na kuwa sehemu ya program yao.

Bi. Shakila amesema kwenye kila chuo wanaendesha kitu ambacho wanakiita kujenga wazo thabiti kwa lengo la kuboresha  bunifu au biashara ambazo wanafunzi wanakuwa nazo ili wakiwa wanaenda kwenye mchakato mwingine zinakuwa na ubora hivyo wanatoa mafunzo kwa kufundisha mada mbalimbali ikiwemo ufanyaji wa tafiti kuhusiana na masoko, wateja vile vile kuhakikisha wanaangalia tatizo vizuri kisha kuja na suluhisho kutoka kwenye biashara au bunifu walizo nazo zenye kukidhi matakwa ya mlaji kuliko kitu chochote.

“Baada ya kutoa mafunzo na kuangalia endapo bunifu au biashara zao ziko sawa kwa maana ya kuwaingizia fedha na je, zina faida na kama kuna changamoto wataweza kukabiliana nazo kwa kujua nini cha kufanya na baada ya hapo tutaenda kwenye hatua nyingine ya kushindanisha hizo biashara au bunifu  kutoka kwa wanafunzi tuliowachagua kutoka katika kila chuo na baadaye tutabaki na tatu bora kutoka kwenye kila chuo na kushindanisha bunifu zao na watakaoshinda tutawashika mkono hatua kwa hatua ili waweze kuendelea mbele”, amesema Shakila Mshana.

Naye Fanius Merchades Mwanafunzi wa mwaka wa tatu, Shahada ya Sayansi ya Chakula SUA ambaye ni mmoja wa washiriki kwenye program ya Start Hub Afrika amesema amefurahi bunifu yake kuchaguliwa na kupata fursa ya kujifunza kitu gani afanye ili kuboresha wazo lake kwa lengo la kufikia malengo yake zaidi kukidhi matakwa ya soko la ajira ambapo kwa pamoja anaamini zoezi hilo litawafanya wapige hatua zaidi kwa manufaa yao na taifa kwa ujumla lakini pia kukiwakilisha chuo.