SUGECO na CRDB kuinua vijana katika kilimo biashara

 Na: Ayoub Mwigune

Zaidi ya wanafunzi 600 kutoka Chuo Kikuu cha Sokoine cha Kilimo (SUA) wameshiriki katika Kongamano lililoandaliwa na Ushirika wa Wahitimu wa Chuo Kikuu cha Sokoine cha Kilimo (SUGECO) la  kuwawezesha kutambua fursa mbalimbali zilizopo katika kilimo biashara sambamba na kupata mafunzo kwa vitendo nje ya nchi.

Akizungumza na SUAMEDIA Bw. Revocatus Kimario ambaye ni Mkurugenzi wa SUGECO amesema  dhima ya kongamano lililoandaliwa na SUGECO ni kuwakutanisha wanafunzi waliomaliza na ambao wanaendelea na masomo kwa ajili ya kuwaelezea fursa mbalimbali zilipo katika kilimo biashara ambazo zinatolewa na Ushirika huo pamoja na wadau wake. 

Kimario amesema tangu kuanzishwa kwa SUGECO, imekuwa ikipeleka vijana mbalimbali wahitimu wa SUA nje ya nchi hasa katika mataifa ya Ulaya, Amerika na Asia ambapo hujifunza namna nzuri ya kufanya kilimo chenye tija lakini mchakato huo huhitaji fedha za awali kumwezesha mhitimu husika kujiandaa ipasavyo.

Amesema  katika kuhakikisha wanaondoa changamoto mbalimbali ambazo zimekuwa zikiwakwamisha vijana kukosa fursa ya kwenda nje ya nchi ili kujifunza kwa  vitendo na kutambua fursa za kilimo biashara SUGECO wamesaini  mkataba na Benki ya CRDB kupitia ‘CRDB Foundation’ ambao utawawezesha zaidi ya wahitimu 2,500 SUA na vyuo vingine kunufaika na fursa hizo.

Kwa upande wake Bw. Joseph Masimba ambaye ni Mkurugenzi wa Ubunifu na Uendeshaji SUGECO ameishukuru SUA kwa namna ambavyo imekuwa ikishirikiana na ushirika huo ambapo kupitia ushirikiano huo umewezesha SUGECO kuendelea kuwajengea uwezo vijana wengi chuoni sambamba na kuwapa fursa mbalimbali katika kuhakikisha vijana wanajifunza katika mataifa mbalimbali ili kuweza kubaini fursa na kuongeza mtandao katika kilimo.

Naye Rachel Mkwizu mwanafunzi wa mwaka wa pili SUA kutoka Ndaki ya Kilimo anayechukua Shahada ya Sayansi ya Udongo na Mimea amesema kupitia kongamano hilo amekuza uelewa kuhusu namna ya kutambua soko katika kilimo pamoja kuona ni namna gani anaweza kukuza ujuzi wake kwa vitendo katika mataifa mbalimbali sambamba  na kujiajiri kupitia kilimo.

Kwa upande wake muwakilishi wa Benki ya CRDB ambao ni wadau wa SUGECO Bi. Shallon Nsule amesema taasisi ya CRDB Foundation imekuwa ikitekeleza Program ya Imbeju inayotoa mafunzo ya ujasiriamali pamoja na mtaji wezeshi kwa vijana na wanawake na hivyo imefurahi kuingia ushirikiano na SUGECO ambapo kupitia ushirikiano huo vijana wengi watanufaika na program hiyo.