SUA yatoa Mafunzo kwa Vitendo kuendana na Sayansi na Teknolojia

 Na: Tatyana Celestine

Kutokana na ukuaji wa Sayansi na Teknolojia katika Kilimo duniani Chuo Kikuu cha Sokoine cha Kilimo (SUA) kinaendelea kuwafundisha wanafunzi wake kwa vitendo kupitia mashamba na bustani za Kilimo cha Matunda na Mboga namna bora ya kuweza kutumia fursa hiyo ili kuwa bora katika ajira au kujiajiri wenyewe.

                     

Akizungumza na SUA MEDIA kuona namna ambavyo matumizi ya Teknolojia za Kilimo zinawezaje kumsadia mwanafunzi awapo katika mafunzo kwa vitendo chuoni hapo, Afisa Kilimo Mwandamizi toka Idara ya Mimea Vipando na Bustani Bw. Godwin Rwezaula amesema kuwa Chuo kinaendelea kuboresha na kuongeza vitendea kazi kulingana na mahitaji ya ufundishaji kutokana na hali ya sasa wanafunzi wanatakiwa kuzifahamu teknolojia mpya na matumizi yake hata kabla hawajahitimu.       

                                                                                                                                                     

Afisa Kilimo huyo ameongeza kuwa suala la kuamua wanafunzi kufanya Mafunzo kwa Vitendo chuoni hapo limekuwa na faida kwa wanafunzi hivyo kupelekea idadi ya wanafunzi kuongezeka ambapo zaidi ya wanafunzi elfu mbili kutumia mashamba na bustani za chuo kwa kufanyia Tafiti na Kilimo tofauti na miaka ya nyuma.

Naye Mwanafunzi wa Mwaka wa Tatu wa Shahada ya Kilimo kwa Ujumla chuoni hapo Bw. Hassan Mohamed ameelezea faida wanayopata kupitia chuo hicho na kusema kuwa mafunzo hayo yanayozingatia ulimwengu wa Teknolojia katika upande wa kilimo kwao ni faida ambayo inawafanya wakimaliza masomo yao kuweza kuelimisha jamii kuhusiana na umuhimu wa kutumia teknolojia katika kilimo kutokana na maeneo wanayotoka elimu hiyo haipo zaidi wanalima kimazoea.

                   

Amezitaja faida wanazozipata kama vile mafunzo ya kutumia  mbegu sahihi, Kilimo na Uvunaji wenye tija, kurahisisha umwagiliaji maji au dawa kwa kutumia ndege (drone), kuongeza uzalishaji wa mazao, utambuzi wa vifaa vya kurahishia kazi, pamoja na kutunza mazingira kwa kuacha kuchoma moto eneo kwa matumizi ya kilimo.

Aidha Bw. Mohamed amesema kuwa elimu wanayopata itasadia kuwakumbusha wazazi watumie fursa hiyo ya ukuaji wa teknolojia kwa kuwafanya watoto wao wajiunge na SUA kusomea kilimo kwani Sekta ya Kilimo kwa sasa inahitaji watu walioelimika hata kama hawakuweza kuajiriwa wawe wanauwezo kujiajiri wenyewe na kuepukana na utegemezi kwa kusubiri ajira.

Aidha amewaasa wanafunzi wenzake kutambua kuwa wao ni mabalozi kutoka SUA hivyo kufanya kwao kazi vizuri katika jamii ndio inaleta hamasa kwa wengine kupenda kilimo wasione shida kujitolea kufanya kazi hizo kwani zinawajenga kuwa bora.

KATIKA VIDEO