SUA, FAO zawanoa wataalam wa Mifugo

 Na: Siwema Malibiche

Wizara ya Kilimo na Uvuvi kwa kushirikina na Shirika la Chakula na Kilimo  (FAO) wameendesha mafunzo kwa wataalamu wa  Tiba za wanyama Tanzania Bara na visiwani katika Chuo Kikuu cha  Sokoine cha Kilimo  (SUA) yenye malengo ya kukuza uelewa katika sayansi ya wanyama Tanzania.

Mkurugenzi wa Utawala na Rasilimali Watu kutoka Wizara ya  Mifugo na Uvuvi Dkt Charles Mhina akifungua mafunzo (Picha zote na Ayoub Mwigune) 
 

Mafunzo hayo yamefunguliwa na Dkt Charles Mhina ambae ni  Mkurugenzi wa Utawala na Rasilimali Watu kutoka Wizara ya  Mifugo na Uvuvi  na  washiriki zaidi ya 30 watapata mafunzo  hayo yanayofanyika  ndani ya Kampasi ya Edward Moringe  mkoani Morogoro  kwa siku thelathini na wiki moja ya kwenda uwandani  kujifunza kwa vitendo.

Dkt Mhina amesema  Wizara ya Mifugo na Uvuvi inatambua umuhimu mkubwa wa kilimo na mifugo nchini katika kukuza ubora wa afya za jamii  kwa kuboresha mazingira mazuri kwa wanyama  huku lengo kuu likiwa ni kupata tija  kupitia mifugo hiyo kwa  mtu mmoja mmoja na taifa kwa ujumla  na serikali itahakikisha kuwa mafunzo haya yatakuwa endelevu ili kuendelea kukuza uelewa  kwa wataalamu wote nchini.

Pia ametoa shukrani kwa SUA   na FAO kwa kutoa ushirikiano wao thabiti na serikali  kwa kuendelea kutoa mafunzo endelevu  kwa wataalamu  wa afya ya  wanyama na binadamu nchini   kwa kushirikiana na serikali kwa lengo la kuisadia jamii  kuondokana na changamoto  katika sekta ya uvuvi na mifungo  ikiwemo magonjwa ya  mlipuko  kwa kuyatafutia ufumbuzi wa haraka.

Naye, Prof Ezra Karimribo Rasi wa Ndaki ya Tiba ya Wanyama na Sayansi ya Afya kutoka SUA ameupongeza uongozi wa chuo kwa kuendelea kuwa wadau wakubwa katika utoaji wa mafunzo kwa wataalamu wa mifugo na  kuongeza kuwa katika mafunzo haya SUA imeusika katika kuandaa mtaala ma mafunzo hayo.  Na amewataka washiriki wote  kuyafanyia kazi yale yote watakayojifunza katika kipindi chote cha mafunzo ili kuleta  tija kwa taifa.

Prof Ezra Karimribo Rasi wa Ndaki ya Tiba ya Wanyama na Sayansi ya Afya kutoka SUA akifuatilia mafunzo hayo

Ameongeza kuwa mafunzo hayo ni mazuri kwa sababu yatasaidia kutambua changamoto zinazowakabili wanyama kwa haraka na kuanza kuchukua tahadhari.

Kwa upande wake, Zehra Zam kutoka Wizara ya Kilimo, Umwagiliaji Maliasili na Mifugo  kutoka  Zanzibar  amesema mafunzo hayo  yatasadia kukuza ubora wa huduma wanazozitoa kwa jamii na ametoa rai kwa wafugaji wote nchini kuwa makini katika kuzingatia hali ya usafi  ndani ya kipindi cha mvua kwa mifugo yao  kwa kuhakikisha  uwepo wa chakula bora, matibabu  na  mazingira mazuri wanayoishi wanyama hao ili  mifugo iweze  kuwa na afya bora  itakayokidhi ubora  wa kimataifa.

Naye Dkt  Ally  Mohamed Mkuu wa Mifugo Zanzibar amesema mafunzo hayo yatasaida kuwakumbusha  wataalamu wote  juu ya namna mzuri ya kukabiliana   na magonjwa ya mlipuko  kwa wakati ili kusaidia kupunguza athari zinazoweza kujitokeza.

Washiriki wa mafunzo  wakiwa katika picha pamoja na mgeni rasmi katika Kampasi ya Edward Moringe  mkoani Morogoro