Kisiwa cha Mayotte chavutiwa na Ubora wa SUA katika Kilimo, Tafiti, Teknolojia na Ufundishaji

 

Na: Tatyana Celestine

Chuo Kikuu cha Sokoine cha Kilimo (SUA) kimeendelea kudhihirisha ubora wake katika Tafiti, Kilimo na ufundishaji kiasi cha kuvutia watu kutoka Kisiwa cha Mayotte kilicho chini ya nchi ya Ufaransa karibu na nchi za Madagascar na Comoro kufika ili kuomba ushirikiano wa ufundishaji, Tafiti, Ushauri wa kitaalamu, Teknolojia mpya na uzalishaji ili kuinua hali ya kilimo kwa nchi yao.

                        

Akizungumza na SUA Media Rais wa Chama cha Kusaidia katika Kilimo ‘Association Moussada Fampitahitahy N'tobi’ (AMFT) Bi. Zakianti Dhurari amesema kuwa SUA ni Chuo kilichopo Tanzania nchi yenye amani na usalama hivyo wameshawishika kufika kwa kuamini SUA itawasaidia kutatua changamoto ya kilimo nchini kwao kutokana na ufinyu wa eneo huku idadi ya watu ikiongezeka.

Aidha amesema kuwa ujio wao umewapa matumaini makubwa kwani SUA imeonyesha nia ya kukubali kuwa washirika wa nchi yao katika nyanja za kilimo, utafiti, pamoja na kubadilishana ujuzi katika teknolojia bora ambazo zitasaidia kwa kubadilishana wanafunzi wa pande hizo mbili.

Naye Katibu Mkuu wa Chama hicho Bw. Boinali Said amesema, baada ya kufika SUA amegundua kuna fursa nyingine nyingi ambazo wangependa kuzitumia kama vile kusafirisha mazao ya kilimo kwenda nchini kwao lakini pia kuhamasisha watu wa nchi yao kuja kujifunza zaidi kuhusu kilimo kupitia SUA kutokana na kuwa na wabobezi na wataalamu wengi chuoni hapo.

                                   

Amesema pamoja na mambo mengine wanategemea kujenga majengo ambayo yatasaidia wanafunzi kutoka kwao lakini pia majengo hayo yatatumia na wanafunzi wengine nchini na wataishi kwa amani kama watoto wa familia moja na hivyo hivyo wanafunzi wa SUA wakienda nchini mwao watapata fursa ya kujifunza lugha ya Kifaransa kwani wako tayari kutoa elimu hiyo kwa wanafunzi wa SUA.

Kwa upande wake Mkurugenzi wa Kurugenzi ya Shahada ya Uzamiri , Utafiti, Uahulishaji wa Teknolojia na Ushauri wa Kitaalam Prof. Japhet Kashaigili amesema kuwa ugeni huo kutoka kisiwa cha Mayotte wamekichagua chuo hicho kwa kuona wanaweza kupata taarifa nyingi ambazo zitawafikisha katika malengo yao na hali hiyo inakiweka chuo chao katika nafasi ya kusaidia ndani na nje ya nchi.

 “Taasisi hiyo inahitaji la kuinua hali ya kilimo katika nchi yao hivyo taasisi hiyo imelenga zaidi katika tafiti na kubadilishana wanafunzi, tafiti katika madawa ya asili, uzalishaji wa miti  na kilimo kwa ujumla hizo ni hatua za awali, hatua zifuatazo ni kuanza mchakato wa makubaliano na baadae ni kufanya utekelezaji.” amesema Prof. Kashaigili.

KATIKA VIDEO