Watumishi SUA wametakiwa kufanya kazi kwa umoja na ushirikiano

Na: Farida Mkongwe

Watumishi wa Chuo Kikuu cha Sokoine cha Kilimo (SUA) wametakiwa kufanya kazi kwa umoja na ushirikiano kwani hiyo ndiyo njia mojawapo  itakayowasaidia katika kutambua na kutekeleza majukumu yao ya utendaji kazi kwa ufanisi mkubwa.

Afisa Utumishi Mwandamizi Idara ya Usimamizi Rasilimali Watu na Utawala SUA Bi. Hilda Chigudulu akiwasilisha mada kuhusu jinsi ya kujenga timu iliyo thabiti katika kutekeleza  majukumu ya utendaji kazi leo.

Wito huo umetolewa Machi 22. 2024 chuoni hapo na Afisa Utumishi Mwandamizi Idara ya Usimamizi Rasilimali Watu na Utawala SUA Bi. Hilda Chigudulu wakati akizungumza na SUA Media baada ya kutoa wasilisho la mada kuhusu jinsi ya kujenga timu iliyo thabiti katika kutekeleza  majukumu ya utendaji kazi.

Bi. Hilda amesema elimu hiyo ya namna ya kujenga timu thabiti yenye umoja na ushirikiano ni muhimu sana kwa watumishi kwani inawasaidia kutambua wajibu wao, kuzijua tabia za watumishi na watu wengine wanao wahudumia pamoja na kuzitambua changamoto zilizopo na namna ya kukabiliana nazo.

“Ukiangalia kwenye kazi kuna kundi la watu wenye kufiri, kundi la watendaji na kundi la watu wa kuimarisha mahusiano, kuna wakati mwingine inaweza ikatokea kutoelewana  kwa hapa na pale kwa hiyo wapo wale watu katika kundi ambao wanasaidia kuhakikisha amani, na upendo unakuwepo na ndiyo maana tupo hapa kuelekezana ili tuweze kusonga mbele kwa pamoja kama Taasisi”, amesema Bi. Hilda.

Kwa upande wao baadhi ya watumishi walioshiriki mafunzo hayo akiwemo Bw. Noel Mgeta ambaye ni Mtunza Kumbukumbu , Bi Vaileth Bupamba Msaidizi wa Ofisi ya Makamu Mkuu wa Chuo na Bw. Barnabas Kipondya ambaye ni  Dereva wameipongeza Menejimenti ya Chuo na waandaaji wengine wa mafunzo hayo na kuomba yawe yanafanyika mara kwa mara ili kuwaongezea ubunifu na kuboresha utendaji wao wa kazi.

“Kuna tabia nyingine nilikuwa sizifahamu lakini leo nimezijua,  hapo awali nilikuwa sijui kama unapofanya kazi na watu unaweza kuwasoma na kuwajua kisaikolojia, kumbe unaweza kumpokea mtu ambaye anakuja akiwa na hasira sasa ni lazima kwanza umjue mtu wa namna hiyo ndiyo uweze kumuhudumia vizuri”, amesema Bw. Mgeta.

BAADHI YA WASHIRIKI KATIKA MAFUNZO 

KATIKA PICHA MJONGEO BOFYA HAPA CHINI