Wataalam wa tiba ya wanyama Tanzania Bara na Visiwani wakutana SUA

 

Na: George Joseph

Shirika la Chakula na Kilimo la Umoja wa Mataifa (FAO) kwa kushirikiana na Wizara ya Mifugo na Uvuvi limeendesha mafunzo kwa wataalam wa tiba ya wanyama wa Tanzania Bara na Visiwani katika Chuo Kikuu cha Sokoine cha Kilimo kwa lengo la kukabiliana na magonjwa ya mlipuko kwa wanyama.

Mafunzo hayo ambayo yamefunguliwa na Kaimu Mkurugenzi wa Huduma za Mifugo Tanzania Dkt. Benezeth Lutegemalinda yatakuwa mafunzo ya muda wa miezi minne ambapo mwezi mmoja washiriki wa mafunzo hayo watayatumia darasani na miezi mitatu katika maeneo wanayofanyia kazi.

Dkt Lutegemalinda amesema malengo ya mafunzo hayo yanawataka washiriki kushiriki vyema ili kwenda kuisaidia jamii kwani mafuno hayo yametumia gharama kubwa hivyo ni vyema kila mshiriki akapata kile kilichokusudiwa. Pia kuisaidia sekta ya mifugo katika maeneo yao ya kazi kwa kwenda kuwafundisha wengine walio chini yao na walio katika idara zao ofisini.

Ameongeza kuwa Wizara inategemea washiriki hao ambao ni watumishi wa serikali kwenda kupunguza magonjwa ya wanyama na magonjwa yanayotoka kwa  wanyama kwenda kwa binadamu ili kuhakikisha ile asilimia ya sasa ambayo ni 60 ya maambukizi ya magonjwa kutoka kwa wanyama kwenda kwa binadamu inafutika na kuwa asilimia sifuri.

Aidha amelishukru Shirika la Chakula na Kilimo la Umoja wa Mataifa kwa kuendelea kushirikiana na serikali kwa lengo la kutoa mafunzo kwa wataalam waliopo makazini ili kusaidia jamii wanazozitumikia.

Kwa upande wake mwakilishi wa Shirika hilo Bi. Stella Kiambi amewapongeza washiriki wote kutoka Tanzania Bara na Visiwani kwa kujitokeza katika mafunzo hayo na kuwa mafunzo hayo ni muendelezo wa mafunzo ambayo yataendelea kutolewa kwa wataalam mbalimbali kwa kushirikiana na Serikali.

Ameongeza kuwa wamependa mafunzo hayo yafanyikie katika Chuo Kikuu cha Sokoine cha Kilimo kwa maana SUA ni mdau mkubwa wa ufugaji na uvuvi na pia ina wataalam wazuri wa wanyama na itasaidia washiriki kujifunza kwa kuona.

Khaulat Rashid Ali ambaye ni Daktari wa Mifugo kutoka Unguja Zanzibar amesema mafunzo hayo yatamsaidia yeye pamoja na watumishi wengine ambao anafanya nao kazi, maana anategemea yatakuwa mafunzo mazuri kwa sababu yameandaliwa na wataalam kutoka Taasisi mahili za mifugo.

Mafunzo hayo yanafanyika katika katika ukumbi wa ICE ulipo Chuo Kikuu cha Sokoine cha Kilimo yameshirikisha washiriki kutoka Mikoa na Wilaya mbalimbali za Tanzania Bara na Visiwani.