Wanawake SUA watakiwa kuwa kitu kimoja na kusaidiana

 

Na: Winfrida Nicolaus

Naibu Makamu Mkuu wa Chuo Kikuu cha Sokoine cha Kilimo SUA Mipango, Utawala na Fedha Prof. Amandus Muhairwa amewataka Wanawake wa Chuo hicho kuwa kitu kimoja na kusaidiana kwa dhati wao kwa wao pindi linapotokea tatizo la aina yoyote hasa la Unyanyasaji wa Kijinsia vilevile kuwasaidia vijana wao chuoni hapo kwa kuwa wao ni kina mama na walezi hivyo wanachukua nafasi ya kwanza na ni rahisi kufikiwa.

Amebainisha hayo wakati akizungumza na wanawake hao kwenye hafla fupi ya kilele cha Siku ya Wanawake Duniani iliyofanyika katika ukumbi wa Multipurpose Kampasi ya Edward Moringe mjini Morogoro ambapo amesema jambo la muhimu litakalo onesha ushirikiano wao ni kuhakikisha hawatalifumbia macho na kulinyamazia suala la unyanyasaji wa kijinsia.

                          

Prof. Muhairwa amewataka wanawake hao kulitumia Dawati la Jinsia lililoanzishwa chuoni hapo kufikisha malalamiko yao na kuwa wa kweli na wawazi pindi wanapolitumia Dawati hilo na si kulitumia kama mlango wa kuangamiza wengine na endapo wakiweza kupeleka malalamiko yao katika Dawati la Jinsia chuoni hapo ana uhakika kuwa watakuwa wamefikisha ujumbe sehemu sahihi kwa kuwa SUA ina Dawati lenye nguvu ambalo halikuchaguliwa kiholela lakini pia lina watu waliobobea na wenye uwezo mkubwa katika kazi.

Aidha amesema ikiwa kwa namna yoyote suala lao haliwezi kupitia kwenye dawati hilo bado kuna njia mbalimbali za kutumia ikiwemo kuwatumia watu wazima waliopo katika taasisi hiyo kwa kuwa hakuna nyumba inayokosa watu wazima hivyo wanaweza kuwafuata na kuwafikishia taarifa zao zaidi.

“Unyanyasaji wa kijinsia ni kitu ambacho kimekuwepo muda mrefu tangu Dunia inaanza labda miaka ya hivi karibuni tu tumeanza kuwa na ufunuo ambao umetambua haki za wanawake hivyo tunaweza kusema tumshukuru Mungu tumezaliwa wakati ambao ni bora na tunapaswa kuutumia kuendelea kuboresha maisha ya binadamu chini ya jua”, amesema Prof. Muhairwa.

Akizungumzia mikakati ya Chuo katika kuwaendeleza wafanyakazi wake Prof. Muhairwa amesema Menejimenti ya Chuo itajitahidi kuhakikisha kunakuwa na bajeti ya mafunzo ili kila mtu aweze kujiendeleza mpaka mwisho wa upeo wake kwani kujifunza sio lazima kupelekwa darasani pekee bali mtu anaweza kujifunza hata akiwa kazini.

Awali kabla ya hafla hiyo Dkt. Charles Moses Lyimo ambaye ni Mratibu wa Utekelezaji wa  Sera za Jinsia SUA wakati akizungumza na SUAMEDIA amesema SUA ni  miongozi mwa Taasisi zinazolinda na kupigania haki za kijinsia kwa pande zote ikiwemo haki ya mwanamke mahali pa kazi, na kwamba wanahitaji mazingira salama ili kuwawezesha kufanya kazi kwa ufanisi.

Ameongeza kwa kuitaka jamii nzima ya Tanzania kuweza kutambua nafasi ya mwanamke ambaye amekuwa ni mzazi, mlezi vilevile ni mwalimu wa kwanza katika kutoa maarifa hivyo wakiitambua nafasi yake na wakatoa ushirikiano wa maarifa na uchumi nchi itaweza kupiga hatua kubwa.