SUA kushiriki kufanya matendo ya huruma Dakawa wilayani Mvomero

 

Na: Farida Mkongwe

Wafanyakazi wa Chuo Kikuu cha Sokoine cha Kilimo (SUA) wametakiwa kujitokeza na kushiriki kwa hali na mali kwenye zoezi la kufanya matendo ya huruma kwa wenye uhitaji yakayofanyika katika kata ya Dakawa wilayani Mvomero siku ya Ijumaa  tarehe 15 Machi, 2024.

                      

Akizungumza SUA Media Mwenyekiti wa Kamati ya Wanawake Chama cha Wafanyakazi RAAWU Tawi la SUA Bibi. Enessa Mlay amesema kamati hiyo inaratibu zoezi hilo ikiwa ni sehemu ya Maadhimisho ya sherehe za Siku ya Wanawake Duniani ambayo kilele chake kilikuwa Machi 8 mwaka huu duniani kote na kwamba Kamati inawategemea wafanyakazi wote wa SUA katika kufanikisha matendo hayo ya huruma.

Bibi. Mlay amesema matendo ya huruma ni matendo yanatoa nafasi ya kuwasaidia watu wasiojiweza wenye uhitaji na kwamba yana thamani kubwa kwani  Mungu uwabariki na kuwapa thawabu watoaji lakini pia yanasaidia kuwafariji watu wasiojiweza na kuona kumbe wanathaminika katika jamii.

“Matendo haya yanafanyika katika mwezi huu Mtukufu wa Ramadhani na pia Kwaresma inaendelea, ni fursa kwetu sote tujitoe tutoe sadaka zetu, pia matendo haya yanaweka kumbukumbu nzuri kwa vizazi vyetu pale watoto wanapoona yanafanyika wanajifunza kuwasaidia wengine na kwa namna hiii ndio tunaweza kuandaa na kukuza vizazi vyenye huruma, upendo na kuondoka ukatili baina yetu”, amesema Bibi. Mlay.

Akizungumzia mambo yanaenda kufanyika katika matendo hayo Mwenyekiti huyo wa Kamati ya Wanawake RAAWU SUA amesema wanategemea kupeleka nguo za aina zote zikiwemo nguo za kike na za kiume pamoja na nguo za watoto, mchele, sukari, unga, sabuni na vitu vingine kutegemeana na jinsi wafanyakazi wa SUA watakavyojitoa katika kufanikisha matendo hayo.