Wanawake mkoani Morogoro waaswa kutofumbia macho matendo ya ukatili

Na: Tatyana Celestine

Wanawake mkoani Morogoro wametakiwa kutoyafumbia macho matendo ya ukatili kwa watoto mkoani humo na kutoa taarifa katika madawati yanayoshughulikia masuala hayo ili kukomesha vitendo hivyo.

 Akizungumza katika kilele cha Siku ya Wanawake Duniani Mkuu wa Mkoa Morogoro Bw. Adam Malima amesema kuwa mbali na masuala ya ukatili wa kijinsia lakini pia wanawake lishe hasa wakati wa ujauzito na siku 100 za mtoto ili kuepuka udumavu na utapiamlo kwa watoto.

 Mkuu huyo wa mkoa amesema kutokutoa taarifa juu ya ukatili kwa Watoto ni kuendelea kulea tabia hiyo na hiyo inaweza kusababisha mtu anayefanya ukatili kuona anafanya sawa na anaweza kufanya kwa watu wengine pia.

Naye Mkuu wa Wilaya Morogoro Bi. Rebeca Msemwa amewaasa wanawake kujiepusha na mikopo maarufu kama kausha damu ambayo inawadumaza kiuchumi na badala yake wakope kwenye Taasisi za mikopo ambazo zinamjali mjasiliamali, mfanyabiashara na mteja kwa kutoza riba nafuu.

Mkuu huyo wa Wilaya amesema Serikali imekuwa ikifanya jitihada mbalimbali katika kumkomboa mwanamke kiuchumi na kuwa wanawake wanahitaji ukombozi wa kifikra na kuongeza elimu madhubuti kuhusiana na haki za wanawake kwani bado kuna wanawake hawajui haki zao.

Akizungumzia haki na stahiki za mwanamke Naibu Msajili wa Mahakama Kuu ya Tanzania Kanda ya Morogoro Bi. Susan Kihawa amesema kuwa wanawake wengine hawaamini kama wana uwezo wa kuomba talaka bali ni mwanaume pekee hivyo elimu ni muhimu kwa wanawake na itawasaidia kuwa na uelewa.

Naye Mkurugenzi wa Unganisha Enveromental Consarvation Organization (UCO) Bi. Sophia Kalinga amesema kuwa ni wazi serikali imefanya juhudi za kumuinua mwanamke kiuchumi katika nyanja tofauti kama vile elimu bure na fursa mbalimbali.

 KATIKA VIDEO