Wafanyabiashara wa vyakula wametakiwa kuzingatia usafi kuepuka Kipindupindu

 Na: Farida Mkongwe

Wafanyabiashara wa vyakula mbalimbali wakiwemo wauzaji wa matunda katika Manispaa ya Morogoro wametakiwa kuzingatia suala la usafi ili kuepukana na ugonjwa wa kipindupindu.

Wito huo umetolewa Machi 12, 2024 na Mratibu wa Elimu ya Afya kwa Umma wa Manispaa hiyo Bw. Musa Joseph Kilanga wakati akizungumza kwenye Kipindi cha Kapu la Leo kinachorushwa na SUA FM kupitia masafa ya 101.1 kuhusu hali ya ugonjwa kipindupindu katika manispaa ya Morogoro.

Bw. Kilanga amesema kuna baadhi ya watu wanafika kwenye vituo vya afya wakionesha dalili za ugonjwa wa kipindupindu hivyo kuwataka wananchi na wafanyabiashara kuzingatia kanuni za usafi ikiwa ni pamoja na kula chakula kikiwa cha moto, kunywa maji safi na salama kwa kuyachemsha au kuweka dawa za kuua vijidudu kwenye maji pamoja na kunawa mikono pindi wanapotoka chooni.

Aidha Mratibu huyo amewataka wafanyabiashara kuacha tabia ya kuuza matunda yaliyomenywa na badala yake wawaachie wateja wakamenye wenyewe na kuyahifadhi katika hali ya usafi kabla ya kuliwa kwani kufanya hivyo kutasaidia kuepukana na ugonjwa huo.

“Nitoe rai kwa wafanyabiashara wanaomenya matunda mfano matikiti, miwa, machungwa, maembe na matunda mengine tunajua ndiyo wanatafuta riziki lakini wauze matunda hayo pasipo kumenya kwani ugonjwa huu una uwezo wa kusambaa kwa haraka zaidi ndani ya muda mfupi, tuwe makini tushirikiane kuutokomeza”, amesema Bw. Kilanga.

Ameongeza kuwa wadudu kama mende na inzi wana uwezo wa kusambaza ugonjwa wa kipindupindu iwapo watatoka chooni na kukutana na vyakula ambavyo vimepoa, havijafunikwa au havijahifadhiwa vizuri.