Wanataaluma SUA watakiwa kujenga ukaribu na wanafunzi wao kubaini wenye mahitaji maalum

 

Na: Farida Mkongwe

Wanataaluma wa Chuo Kikuu cha Sokoine cha Kilimo (SUA) wametakiwa kujenga ukaribu na wanafunzi wao ili kuweza kuwabaini wanafunzi wenye mahitaji maalum ambayo hayaonekani kwa urahisi na kuwasaidia wanafunzi hao ili waweze kufikia malengo yaliyowapeleka chuoni hapo.

Akizungumza na SUA Media Machi 20, 2024 mjini Morogoro katika mafunzo ya kuwajengea uwezo wanataaluma hao wa namna ya kuboresha ufundishaji, Mhadhiri Msaidizi kutoka Idara ya Uhasibu na Fedha, Ndaki ya Uchumi na Biashara SUA Jacob Chunga amewashukuru waandaaji kwa kuweka mada ya watu wenye uhitaji maalum katika mafunzo hayo kwani  mwanzoni wanataaluma wengi walikuwa hawajui namna ya kuwabaini na kuwasaidia wanafunzi hao.

                            

Amesema baada ya kupata mafunzo hayo sasa wanataaluma wanapaswa kuzitumia mbinu walizofundishwa za kuwabaini wanafunzi wenye uhitaji maalum ambao ni pamoja na wanafunzi wenye ulemavu wa kuona, kusikia, au ulemavu mwingine wa aina yoyote ambapo pia wanaweza kuwabaini kupitia viongozi wao wa madarasa lengo likiwa ni kuwasaidia ili wasome na kufaulu vizuri kama wanafunzi wengine wasio na changamoto za aina hiyo.

“Sisi wanataaluma tunatakiwa kuwa na utayari wa kuwasaidia wanafunzi hawa tunafundisha darasani wengine wanaona lakini wengine hawaoni vizuri, wengine wana changamoto za kuandika, wengine za kusikia lakini wote tupo nao darasani, pia tunatakiwa kuwajengea uwezo wa kujiamini wanafunzi hawa kwa sababu sio wote wanakuwa tayari kuonesha hali halisi walivyo, wengine wanakuwa na uoga wa kuelezea changamoto zao”, amesema Mhadhiri huyo Msaidizi.

Kwa upande wake Dkt. Neema Kitasho kutoka Idara ya Uchumi Misitu na Mazingira SUA pamoja na kupongeza mafunzo hayo pia ameshauri mafunzo ya aina hiyo yawe yanafanyika kila unapoanza mwaka wa masomo ili kuwakumbusha walimu lakini pia kuwawezesha kufahamu aina ya wanafunzi wanaowapokea na kuwa nao darasani ili waweze kuwasaidia kuanzia hatua za mwanzo wanapoingia chuoni hapo.

                      

“Somo la leo limenifumbua macho kiukweli kuna vitu ambavyo tunavichukulia kama kawaida tukichukulia kuwa watu wote  wapo sawa lakini somo la leo limenifanya nitafakari na kuchukua hatua kwamba inabidi nitazame wanafunzi wangu wote darasani ili nibaini changamoto zao na baada ya kuzibaini kumbe kuna vitengo pia vinavyoshughulikia hili jambo kwa hiyo kwangu itakuwa rahisi kutoa msaada huo, mwanzoni nilikuwa sijui kama kuna jambo kama hili”, amesema Dkt. Kitasho.