Wanataaluma SUA wajengewa Uwezo kuendana na mabadiliko ya Teknolojia katika ufundishaji

 

Na: Farida Mkongwe

Chuo Kikuu cha Sokoine cha Kilimo (SUA) kimeandaa mafunzo ya siku nne kwa ajili ya Wanataaluma wa Chuo hicho yenye lengo la kuwajengea uwezo Wanataaluma hao kwenda sambamba na mabadiliko ya teknolojia ili kuweza kuzitumia teknolojia hizo kwenye kazi zao mbalimbali zikiwemo za ufundishaji.

 Mgeni rasmi Dkt. Damas Philip (wa kwanza kushoto) katika picha ya pamoja na wawezeshaji wa mafunzo kwa Wanataaluma SUA, Prof. Japhet Kashaigili (wa kwanza kulia), Prof. Gration Rwegasira (wa pili kulia) na Dkt. Vioeth Makuku kutoka Ghana (wa pili kushoto).

                          

Akifungua mafunzo hayo kwa niaba ya Makamu Mkuu wa Chuo hicho Prof. Raphael Chibunda, Rasi wa Ndaki ya Uchumi na Stadi za Biashara kutoka SUA Dkt. Damas Philip amesema mafunzo hayo ni muhimu kwani yatawasaidia wanataaluma kujua teknolojia mpya zilizopo kwa sasa na hivyo kuboresha mbinu za ufundishaji zitakazozalisha wahitimu wenye ubora ndani na nje ya nchi.

“Ukiangalia Mpango Mkakati wa Chuo chetu wa 2022 – 2026 kati ya malengo yetu ni kuhakikisha tunaboresha wahitimu wanaotoka chuoni, hivyo ni lazima tuboreshe namna tunavyowatengeneza na watengenezaji ndio hawa ambao tumewaita leo kwenye mafunzo ili waweze kufundisha na kutoa mafunzo kwa namna bora zaidi na hatimaye tuweze kupata wahitimu watakaohitajika katika masoko ya ndani na nje ya nchi”, amesema Dkt. Damas.

Dkt. Damas amewataka Wanataaluma hao kuzingatia mafunzo watakayoyapata ambayo yanatolewa na wawezeshaji mahiri ili waweze kufikia malengo ya mafunzo hayo.

Akitoa salaam za shukrani kwa Mgeni Rasmi kwa niaba ya Naibu Makamu Mkuu wa Chuo upande wa Taaluma, Utafiti na Ushauri wa Kitaalamu Prof. Maulid Mwatawala, Mkurugenzi wa Kurugenzi ya Uzamili, Utafiti, Uhaulishaji wa Teknolojia na Ushauri wa Kitalaamu Prof. Japhet Kashaigili amesema suala la kuwajengea maarifa wafanyakazi lipo wazi na kwamba lazima wahakikishe walimu wanajengewa uwezo.

“Walimu pamoja na watendaji wote waliopo chuoni tunawajengea uwezo wa namna mbalimbali kutambua njia bora na za kisasa za kuwezesha ufundishaji na kuwatengeneza mitaala mizuri ambayo inaendana na matarajio ya sasa na tuna imani kupitia mafunzo haya washiriki watajifunza na kujiongezea zaidi”, amesema Prof. Kashaigili.

Mafunzo hayo ya kuwajengea uwezo Wafanyakazi wanataaluma wa SUA yanashirikisha washiriki 87 na yanafanyika kwa siku nne kuanzia Machi 18 hadi machi 21, 2024 mjini Morogoro.

Prof. Maulid Mwatawala ni Naibu Makamu Mkuu wa Chuo - Taaluma Utafiti na Ushauri wa Kitaalamu, Chuo Kikuu cha Sokoine cha Kilimo (SUA).