Wahadhiri Waandamizi SUA wajengewa uwezo kuondokana na vikwazo katika ufundishaji

 

Na: Farida Mkongwe

Kitengo cha Uthibiti Ubora kilichopo katika Chuo Kikuu cha Sokoine cha Kilimo (SUA) kupitia Mpango wa Kuboresha ufundishaji na ujifunzaji katika mazingira ya Chuo (UTLIP) kimeahidi kutoa huduma zitakazohakikisha jamii ya SUA inatunzwa vile inavyotakiwa.

                                         

Hayo yamezungumzwa Machi 18, 2024 na Mkurugenzi wa Kitengo hicho Prof. Gration Rwegasira wakati akizungumza na SUAMEDIA kuhusu mafunzo ya kuwajengea Wahadhiri Waandamizi wa SUA yanayofanyika mjini Morogoro.

Akizungumzia mafunzo hayo Prof. Rwegasira amesema miongoni mwa kazi zao ni kuwajengea uwezo wafanyakazi na kwa sasa wamejikita kwa Wahadhiri Waandamizi kwa lengo la kuwajengea uwezo wa aina mbalimbali ikiwa ni pamoja na jinsi ya kushughulika na madarasa yenye wanafunzi wengi ukizingatia kwamba Wahadhiri wengine walianza kazi kipindi ambacho wanafunzi walikuwa wachache hali ambayo inaweza kuwapa mtafaruku wa kimawazo wa namna ya kukabiliana na darasa la aina hiyo.

Ameyataja mafunzo mengine yatakayotolewa kuwa ni mafunzo kuhusu nidhamu za kiofisi ambayo yatatolewa na Sekretarieti ya Maadili ya Utumishi wa Umma, Mabadiliko ya Sheria na taratibu za mitihani katika ngazi ya Shahada za Uzamili na Uzamivu na taratibu mpya za fedha kutokana na taasisi zinazoshughulikia mambo ya fedha na manunuzi kubadilisha taratibu na mifumo mbalimbali.

“Mafunzo mengine yatakayotolewa ni kuhusu masuala ya Jinsia, tunajua hivi karibuni kulikuwa na Maadhimisho ya Siku ya Wanawake Duniani na sisi SUA tunajali suala la jinsia na tunazingatia ushirikishwaji wa wanawake katika Sera na mambo mengine yakiwemo masuala ya uamuzi na ndiyo maana tumeweka mada hiyo katika mafunzo haya”, amesema Prof. Rwegasira.

Mafunzo mengine yatahusu suala la wanafunzi na wafanyakazi wenye mahitaji maalum ambapo Wahadhiri hao watajengewa uwezo wa namna ya kuwasaidia pamoja na kukabiliana na changamoto zinazowakuta watu hao wa makundi maalum.

Aidha Mkurugenzi huyo wa Kitengo cha Uthibiti Ubora ameushukuru Mradi wa HEET ambao umefadhili kwa kiasi kikubwa mafunzo hayo pamoja na Chuo cha SUA sambamba na kuwashukuru wawezeshaji wa mafunzo hayo kutoka SUA, Chuo Kikuu cha Dar Es Salaam (UDSM), Sekretarieti ya Maadili ya Utumishi wa Umma, Mwezeshaji kutoka Ghana pamoja na wawezeshaji wengine.