BAKITA na TCRA wekeni miongozo ya matumizi sahihi ya Kiswahili - Waziri Mkuu Mhe. Kassim Majaliwa

 Na: Gerald Lwomile

Waziri Mkuu wa Jamhuri ya Muungano wa Tanzania Mhe. Kassim Majaliwa amelitaka Baraza la Kiswahili Tanzania (BAKITA) na Mamlaka ya Mawasiliano Tanzania (TCRA) kutoa miongozo ya matumizi sahihi ya lugha ya Kiswahili katika vyombo vya habari ili kulinda lugha hiyo.

Waziri Mkuu wa Jamhuri ya Muungano wa Tanzania Mhe. Kassim Majaliwa akifungua Kongamano la Nne la Idhaa za Kiswahili Duniani

Akifungua Kongamano la Nne la Idhaa za Kiswahili Duniani Machi 18. 2024 Jijini Mbeya, Mhe. Majaliwa amesema katika miaka ya hivi karibuni kumekuwa na upotoshaji mkubwa wa maneno ya lugha ya Kiswahili katika vyombo vya habari na kubadili maana ya maneno.

Anasema katika kuhakikisha Kiswahili kinaendelea kuenea duniani kote hivi sasa kuna vituo 44 vya habari  vinavyotangaza kwa lugha ya Kiswahili jambo ambalo linaonyesha ni kwa kiasi gani lugha hiyo ni Tunu ya Taifa.

Aidha Waziri Mkuu Kassim Majaliwa ameziagiza Mamlaka ya Chakula na Dawa (TMDA) na Shirika la Viwango Tanzania (TBS) kuhakikisha dawa zote zinazoingia sokoni zinakuwa na chapisho lenye maelekezo lililoandikwa kwa lugha ya Kiswahili ili kumpa mtumiaji wa lugha ya hiyo kuelewa matumizi ya dawa hizo.

Akimkaribisha Waziri Mkuu kufungua kongamano hilo Waziri wa Utamaduni Sanaa na Michezo Mhe. Damas Ndumbalo anasema lugha ya Kiswahili imeendelea kuenea duniani kote kwani hivi sasa zaidi ya watu milioni 5 wanazungumza lugha hiyo duniani.

Waziri wa Utamaduni Sanaa na Michezo Mhe. Damas Ndumbalo  akitoa neno kabla ya kumkaribisha Waziri Mkuu kufungua Kongamano

Anasema kukua kwa lugha ya Kiswahili kumesababisha Shirika la Elimu, Sayansi na Utamaduni la Umoja wa Mataifa (UNESCO) kutangaza tarehe 7 ya mwezi Julai kila mwaka kuwa ni Siku ya Lugha ya Kiswahili Duniani.

Akizungumza katika Kongamano hilo Katibu Mtendaji wa Baraza la Kiswahili Tanzania Bi. Consolata Mushi anasema  Tasnia ya Habari ina nafasi kubwa ya kubidhaisha Kiswahili Duniani, hivyo ni muhimu kutumia lugha hiyo kwa ufasaha.

Naye Mwakilishi wa Makamu Mkuu wa Chuo Kikuu cha Sokoine cha Kilimo (SUA) Prof. Raphael Chibunda, Mhadhiri katika Chuo Kikuu cha Sokoine Dkt. Onesmo Nyinondi akizungumza na vyombo vya habari anasema Kongamano hilo litasaidia wandishi wa habari na walumbi,washititi na wanagenzi wa lugha ya Kiswahili kukuza na kueneza Kiswahili fasaha.

Mhadhiri kutoka Chuo Kikuu cha Sokoine Dkt. Onesmo Nyinondi akizungumza katika matangazo mubashara na mtangazaji wa TBC Swaumu Mavura katika Kongamano hilo.

Picha chini ni washiriki wa kongamano hilo