Wafanyabiashara Mkoa wa Morogoro wasichukulie Mwezi Mtukufu wa Ramadhani kama fursa kwa kupandisha bei za vyakula

 

Na: Tatyana Celestine 

Wafanyabiashara wa Mkoa wa Morogoro wameombwa kutochukulia Mwezi Mtukufu wa Ramadhani kama fursa ya kutaka kupata faida kubwa kwa kupandisha bei za vyakula kwani hali hiyo inawaathiri wafungaji kwa kuwa kuna watu hawana uwezo wa kununua vyakula kwa bei ya juu.

Akizungumza na SUA MEDIA Imamu wa Msikiti wa Mungu Mmoja uliopo Kiwanja cha Ndege Manispaa ya Morogoro Khalid Omari amesema kupitia mwezi wa Ramadhani watu wanatakiwa watende mema na kusaidia wale wasiojiweza katika kila hali ikiwemo mavazi, chakula na hata kuwafariji wale wanaopitia nyakati ngumu.

Imam Omari amesema wafanyabiashara wa dini zote  wanapaswa kutambua kuwa huu ni mwezi wa kupata thawabu kutokana na waumini wa dini zote kuwepo kwenye mfungo kwa maana ya Kwaresma na Ramadhani hivyo hawatakiwi kuwa kikwazo kwa waumini hao kushindwa kupata mahitaji yao muhimu.

Aidha amewataka waislamu kuelewa kuwa kufunga ni ibada na ni utekelezaji wa mojawapo ya nguzo za dini hiyo hivyo wanapaswa kula chakula kinacholingana na uwezo wao badala ya kutaka chakula cha gharama ambazo hawawezi kuzimudu.

Amesema katika mwezi huu wa Ramadhani ni muhimu kwa waislamu kufuata matendo ya Mtume wao Mohamad kwa kufunga ikiwa na maana ya kujizuia kula, kunywa na kufanya tendo la ndoa nyakati za mchana wa mwezi mtukufu wa Ramadhani pamoja na mambo mengine yote yasiyofaa kama walivyoamriwa na dini yao.