SUA kutoa elimu kwa wakati ikiwemo kwa wanafunzi na wakulima

Na: Farida Mkongwe

Chuo Kikuu cha Sokoine cha Kilimo (SUA) kinatarajia kuboresha mifumo yake ya kimtandao na kuhakikisha mifumo hiyo inaweza kufanya kazi vizuri hali itakayofanikisha kutoa elimu kwa wakati kwa wadau wake wakiwemo wanafunzi na wakulima.

                        

Hayo yameelezwa Machi 21, 2024 na Kiongozi wa Kidigitali wa Mradi wa Elimu ya Juu kwa Mabadiliko ya Kiuchumi (HEET) ambaye pia ni Mhadhiri Mwandamizi Idara ya Uhandisi Kilimo SUA Dkt. Kadeghe Fue wakati akizungumza na SUA Media kwenye mafunzo ya kujengewa uwezo wanataaluma wa SUA yanayofanyika kwa siku nne mjini Morogoro.

Dkt. Fue amesema kazi mojawapo inayofanywa na Mradi wa HEET ni kuhakikisha wanashirikiana na wadau mbalimbali katika kuboresha mifumo ya Chuo na hivyo kuiwezesha mifumo hiyo kufanya kazi kwa ubora,  haraka na ufanisi mkubwa.

Akizungumzia kuhusu mafunzo yanayotolewa kwa wanataaluma Dkt. Fue amesema ni muhimu kuwafundisha wanataaluma hao namna bora ya kufundisha kwa njia ya mtandao kwa sababu unapofundisha vitu kwenye mtandao ni tofauti na unavyofundisha ukiwa darasani.

Amesema katika maboresho hayo wanatarajia kuifanya mifumo yote iwe na uwezo wa kuwasiliana tofauti na ilivyo sasa ambapo ukihama kutoka mfumo mmoja kwenda mwingine utalazimika kutumia jina la mtumiaji na nywila nyingine hata kama mifumo unayoitumia yote ni ya Chuo.

“Kwa mfano kama unataka kuingia katika mfumo utakuwa unapata user name na password ambayo utakuwa unaitumia kwenye mifumo yote ya Chuo lakini kwa sasa jinsi mifumo ilivyo kila mfumo una user name yake na password yake lakini katika maboresho tutakayoyafanya kwenye huu mfumo mpya unaruhusu user name na password za aina moja zitumike katika mifumo mingine ambayo ipo SUA”, amesema Dkt. Fue.

Mafunzo ya kuwajengea uwezo Wanataaluma wa SUA kuhusu mbinu za kuboresha ufundishaji yalianza Machi 18, 2024 mjini Morogoro na yatamalizika Machi 21, 2024.