Wizara ya Kilimo yaipongeza SUA kupitia watafiti wake kwa Tafiti nzuri za Kilimo zinazolenga kuongeza tija na kpunguza umasikini

 Na: Cavin Gwabara – Dodoma.

Wizara ya Kilimo imekipongeza Chuo Kikuu cha Sokoine Cha Kilimo (SUA) kupitia wataalamu wake kwa namna kinavyofanya Tafiti nzuri na muhimu ambazo zinasaidia Taifa katika kufanya maamuzi muhimu kwenye sekta ya kilimo pamoja na kutatua changamoto mbalimbali za wakulima ili kuinua uchumi wa jamii na nchi.

Picha ya pamoja ya mgeni rasmi, Viongozi wa SUA pamoja na wadau walioshiriki mkutano huo kutoka Taasisi na maeneo mbalimbali nchini.

Pongezi hizo zimetolewa na Waziri wa Kilimo Mhe. Hussein Bashe (MB) Kwa niaba yake na Mkurugenzi wa Idara ya Mafunzo huduma za ugani na utafiti Dkt. Wilhelm Leornad Mafuru wakati akifungua Mkutano wa uwasilishwaji wa matokeo ya Mradi wa Biashara, Maendeleo na Mazingira nchini TRADE HUB unaofanyika Jijini Dodoma na kuwakutanisha wadau wote walioshiriki kwenye mradi huo wa miaka mitano.

“Sisi sote ni mashuhuda ya mchango mkubwa wa Chuo Kikuu cha Sokoine cha Kilimo katika kusaidia kuboresha kilimo chetu nchini, tumesikia shuhuda mbalimbali humu za mtu mmoja mmoja lakini pia za wadau ikiwemo mashirika na vikundi na hii inatufanya kuamini kuwa Chuo hiki kinatoa mchango uliotukuka” alisema Dkt. Mafuru.

Amesema mradi huu wa TRADE HUB umetekelezwa katika wakati muafaka ambao nchi inatekeleza sera ya kuinua uchumi kupitia sekta za Kilimo,Viwanda na Biashara hivyo matekeo ya mradi huu yatasaidia katika kufanikisha mpango na mkakati huo kupitia kufanya maamuzi yanayotokana na utafiti wa kisayansi.

Dkt. Mafuru amesema matokeo ya mradi huo yatasaidia kuongeza ubunifu katika mnyororo mzima wa thamani wa uchakataji wa bidhaa na kuziongezea thamani na hatimae kuongeza kipato cha wananchi na kuipatia serikali mapato.

Amewataka wadau wanaoshiriki mkutano huo muhimu kushiriki kikamilifu kusikiliza matokeo hayo awali na kuchangaia vizuri kwenye kutoa maoni na mapendekezo yatakayosaidia watafiti kupata matokeo mazuri ambayo yatabeba sura ya wadau wote na Serikali.

Akitoa salamu za Chuo Kikuu cha Sokoine cha Kilimo (SUA) Naibu Makamu Mkuu wa Chuo Upande wa Taaluma Utafiti na ushauri wa Kitaalamu Prof. Maulid Mwatawala amesema mradi huo ni sehemu tuu ya miradi mingi ambayo inasaidia nchi kufikia malengo yake kwa kupata ushahidi wa kisayansi kwenye sekta mbalimbali.

“Mchango wetu katika Ajenda 2030 sasa unaonekana kwamba tunakwenda kwenye kilimo biashara na kwenye mradi huu tumeona mambo mbalimbali yaliyofanywa na watafiti kwenye kufikia lengo hilo kama vile ugumu uliopo kwetu kama taifa kwenye kupanga bei ya mazao yetu kwenye soko la dunia pamoja na maswala ya ushiriki kwenye utungaji wa sera za biashara ya kimataifa na hii kutupatia picha halisi ya nafasi yetu kimataifa na nini tufanye kufikia malengo” alieleza Prof. Mwatawala.

Amesea matokeo ya Mradi huu yanafungua wadau kuona nafasi yao kwamba pamoja na kuzalisha sana lakini wajue mambo mbalimbali yanayohusu biashara nzima ya mazao ya kilimo mapema ili isijefika mbele wazalishaji na wafanyabiashara wakakwama.

Prof. Mwatawala anasema ni matumaini yake kuwa matokeo ya utafiti huo yatasaidia wizara katika kuboresha sera zilizopo na kutunga zingine ambazo zitawezesha uzalishaji na uuzaji wa mazao hayo katika soko la ndani na lile la kimataifa na kusaidia Taifa kujipatia fedha na kuinua uchumi.

Kwa upande wake Mtafiti kiongozi wa mradi huo wa TRADE HUB upande wa Tanzania Prof. Reuben Kadigi amesema Mradi huo umefanya tafiti katika mazao ya Sukari,Soya,Kahawa, Nyamapori na sekta ndogo ya Wanyamapori katika kipindi cha miaka mitano kuanzia mwezi wa pili mwaka 2019.

“ Mradi huu umelenga kuhakikisha biashara ya mazao ya kilimo na Nyamapori zinakuwa injini ya ukuaji wa uchumi jumuishi na kuondoa umasikini ni mradi muhimu kwakuwa pia unasaidia kuwepo kwa uchumi endelevu kama ilivyoanishwa kwenye Mpango wa Maendeleo Endelevu (SDG) huku ikuzuia uharibifu wa mazingira na upotevu wa bioanuai” alifafanua Prof. Kadigi.

 Aidha akizungumzia malengo ya mkutano huo amesema kuwa unalenga kutoa matokeo ya utafiti kwa wadau wote wanaoguswa na mazao hayo ili kuwapa mrejesho wa kile walichokiona kwenye utafiti wao wakati wakimalizia kazi ya uandishi wa maandiko mafupi ya kisera kwaajili ya kuwasilisha kwa wadau na serikali ili kuboresha uzalishaji wa mazao hayo na namna ya kufanya biashara hiyo.

Mradi huo unatekelezwa na watafiti kutoka Chuo Kikuu cha sokoine cha Kilimo kwa kwa kushirikiana na washirika wa Maendeleo kutoka nchi 15 za Afrika, Asia, Ulaya na Amerika ya Kusini kwa ufadhili wa Programu ya Mazingira ya Umoja wa Mataifa (UNEP).

Mkurugenzi wa Idara ya Mafunzo huduma za ugani na utafiti Dkt. Wilhelm Leornad Mafuru wakati akifungua Mkutano huo wa Mradi wa TRADE HUB.

Naibu Makamu Mkuu wa Chuo Kikuu cha Sokoine cha Kilimo Upande wa Taaluma Utafiti na ushauri wa Kitaalamu Prof. Maulid Mwatawala akitoa salamu za SUA kwa wadau wa Mkutano huo.

Mtafiti kiongozi wa mradi huo wa TRADE HUB upande wa Tanzania Prof. Reuben Kadigi kutoka SUA akizungumzia malengo ya mkutano huo wa wadau pamoja na kazi zilizofanywa na mradi hadi sasa.

Prof. Neil Burgess ambaye ni mtafiti Mkuu katika Kituo cha Dunia cha Ufatiliaji wa Uhifadhi (WCMC) na msimamizi mkuu wa mradi huo kutoka Programu ya Mazingira ya Umoja wa Mataifa (UNEP).

Rasi wa ndaki ya Uchumi na Stadi za Biashara ya Chuo Kikuu cha Sokoine cha Kilimo Dkt. Damas Philip akitoa neno la shukrani kwa mgeni rasmi.

Wadau wa mradi huo wakifuatilia mawasilisho.

Wadau wa mradi huo wakifuatilia mawasilisho.

Wadau wa mradi huo wakifuatilia mawasilisho.

Wadau wa mradi huo wakifuatilia mawasilisho.