SUA kwa kutumia ubunifu, saidieni mkoa katika kukuza mazao ya kimkakati

Na: Josephine Mallango

Mkuu wa Mkoa wa Morogoro Adam Malima amesema vijana kutoka katika mradi wa YEESI LAB SUA watasaidia mkoa katika kuongeza uzalishaji na tija katika kilimo na kutatua changamoto za mazingira katika Mlima Uluguru.

Mkuu wa Mkoa wa Morogoro Adam Malima akizungumza na vijana wabunifu (Picha zote na Josephine Mallango)

Amesema hayo wakati akizindua shindano la vijana la kuwezesha ubunifu na kampuni changa za kiteknolojia ya kilimo Tanzania lililoandaliwa na mradi wa YEESI LAB SUA ambapo vijana saba kati ya 100 ndio waliofanikiwa kuingia fainali ambapo washindi watasaidiwa kufungua kampuni za uzalishaji ndani ya mkoa wa Morogoro.

Mkuu huyo wa Mkoa amesema mradi huo umemvutia kwa kuwa umelenga vijana ambao ndio wazalishaji wakubwa na kwamba endapo yaliyokusudiwa yatatekelezeka ana matumaini makubwa vijana hao watatoa elimu ya kilimo kwa wengine, kutoa ajira katika mkoa wa Morogoro kwa kuanzishwa viwanda na kwamba ofisi yake ya mkoa watakuwa wa kwanza kutoa motisha na vipaumbele kwa ajili ya shughuli zao zitakapoanza .

Ameongeza kuwa ujio wa kampuni hizo utaongeza uzalishaji kwa wakulima zaidi ya asilimia 75 katika mkoa wa Morogoro kuwa na uhakika wa soko ambapo pia amekiomba Chuo Kikuu cha Sokoine cha Kilimo (SUA) kusaidiana na mkoa katika mazao ya kimkakati ya karafuu na parachichi yaliyoanzishwa katika mkoa wa Morogoro kwa ajili ya kuongeza uchumi wa mkoa na taifa na kuhifadhi mazingira hasa katika maeneo ya milima ya uluguru ambako yalibaki na vipara baada ya uharibifu wa mazingira .

Kwa upande wake Mwakilishi wa Makamu Mkuu wa Chuo Prof. Esron Karimuribo amesema vijana hao wabunifu wanaotoka katika mkoa wa Morogoro ambao wao kama chuo wanatamani kuona ubunifu unakua katika mkoa wa Morogoro na kwamba SUA miaka 10 iliyopita haikutoa kipaumbele zaidi kwa ubunifu na walijikita zaidi katika kutoa mafunzo na tafiti wakasahau kuwa kupitia ubunifu ni eneo jingine muhimu na vyuo vikuu duniani kote vinatakiwa kuwa chachu za kiteknolojia ambazo zitatoa majawabu ya changamoto zinazopatikana ambapo mwaka 2005 sera ya ubunifu ndio ilianza mchakato chuoni hapo mpaka leo .

Prof. Karimuribo akifafanua jambo

Mwakilishi kutoka Wizara ya Elimu , Sayansi na Teknolojia ambaye ni Mkurugenzi Msaidizi anayehusika na Sayansi na Teknolojia Dkt. Alexander Mtawa amewapongeza SUA kwa kuandaa vijana na kuwakuza na kwamba hauwezi kuzungumzia ubunifu katika nchi ukawaacha SUA ambao wameanza miaka mingi ukilinganisha na vyuo vingine.

Dkt. Alexander Mtawa akizungumza na wabunifu

Naye Mhadhiri Mwandamizi kutoka SUA na Mkuu wa Mradi wa YEESI LAB
Dkt. Kadeghe Fue amesema vijana hao wabunifu watasaidiwa kufungua kampuni na masuala yote ya uendeshaji ndani ya mkoa wa Morogoro ambapo watakuwa wakitatua changamoto kwa kutumia mifumo mbalimbali ya kuwasaidia wakulima kufanya maamuzi sahihi shambani kuambatana na ubunifu na teknolojia na kwamba vijana wote saba waliofika fainali wataangalia namna ya kuwasaidia hata ambapo watabaki kati ya watano waliotakiwa .