Watumishi NMB watembelea SUA kupata elimu ya kilimo na ufugaji

 

Na: Winfrida Nicolaus

Watumishi wa Benki ya NMB kutoka maeneo mbalimbali ya Tanzania ambao wanakaribia kustaafu wametembelea Chuo Kikuu cha Sokoine cha Kilimo (SUA) kwa lengo la kupata elimu, kujifunza kwa vitendo na kujionea shughuli mbalimbali za Kilimo na Ufugaji zinazofanywa Chuoni hapo ikiwa ni mojawapo ya maandalizi ya maisha baada ya kustaafu.

Amebainisha hayo Program Meneja wa Kitengo cha Programu ya Ustawi wa Mwajiriwa kutoka Kampuni ya Assemble Insuarance ambaye ni Mratibu wa ziara hiyo John Ngonyani wakati akizungumza na SUA Media Februari 8, 2024 ambapo amesema lengo kubwa ya ziara yao SUA ni kumuandaa mtumishi ambaye anajiandaa kustaafu aweze kuzitambua fursa mbalimbali zitakazompa mwangaza baada ya kustaafu.

“Tuna program ambayo inawaandaa wastaafu wafanyakazi kwa ajili ya kustaafu na mara nyingi tunachukua watu ambao wamekaribia kustaafu kuanzia miaka 45-50, mafunzo haya yanalenga sana kuwawezesha kuingia kwenye ujasiriamali kwa maana kwamba wengi ni waajiriwa na wengi wamejaribu kufanya biashara lakini wakashindwa vile vile wamewahi kulima lakini wakakwama hivyo sisi tunalenga zaidi kuwakwamua pale waliposhindwa ili wasogee mbele”, amesema Bw. Ngonyani

Amesema wameichagua SUA kama sehemu ya kujifunzia kwa kuwa ndio kitovu cha Kilimo nchini na wanaamini watumishi hao kwa sababu wanaenda kwenye kustaafu na sehemu pekee ambapo wanaweza kuwekeza kirahisi ni kwenye kilimo ikiwemo kwenye Ufugaji wa Samaki, Ngombe wa maziwa, kuku, kilimo cha matunda na mbogamboga ambavyo havihitaji nguvu nyingi hivyo kwa mtu ambaye ni mstaafu inakuwa ni rahisi kwake kufanya vitu hivyo na kuweza kujikwamua kiuchumi.

Kwa upande wao wastaafu hao watarajiwa Kizito Shija Mtaalam wa Majengo wa NMB kutoka Ofisi za Kanda Dodoma na Atupele Lunkombe Afisa wa Benki NMB kutoka Simiyu wamewashukuru Wataalam wa SUA kwa kuwapatia elimu na maarifa ya kutosha ambayo yamewachochea katika akili zao kuwa wakistaafu wanaweza kujiingiza katika shughuli mbalimbali za kilimo ambazo zitawasaidia kuwaingizia kipato na kujikimu kimaisha hivyo imewaondoa hofu ya kustaafu na kuwapelekea wengi wao kutamani kustaafu hata kabla ya wakati na kuingia kwenye ujasiriamali kwa sababu ya SUA.

Katika ziara hiyo Watumishi hao walitembelea Shamba la Mafunzo katika Kitengo cha Uchumi wa Buluu, Kitengo cha Wanyama na Kitengo cha Bustani na Mbogamboga kinachojihusisha na uzalishaji wa Mbogamboga na matunda, Miche ya viungo mbalimbali pamoja na Maua.