Wananchi watakiwa kufuatilia taarifa za TMA ili kuchukua tahadhari za mvua

 

Na: Godfrey Msinjili

Mamlaka ya Hali ya Hewa (TMA) Kanda ya Mashariki imewataka wananchi kujenga utamaduni wa kufuatilia taarifa za utabiri wa hali ya hewa unaotolewa kupitia vyombo mbalimbali ili kuchukua tahadhari pale inapohitajika.

Wito huo umetolewa Februari 7, 2024 na Meneja wa Mamlaka hiyo Bi. Hidaya Senga wakati akizungumza na SUA Media ofisini kwake kuhusu mwenendo wa mvua kwa Kanda hiyo na umuhimu wa kufuatilia taarifa za utabiri wa hali ya hewa katika misimu tofauti.

Bi. Senga amesema wananchi wanatakiwa kufuatilia taarifa mbalimbali za utabiri zinazotolewa kwa saa 24, taarifa za wiki, siku kumi kumi na taarifa za kila mwezi ambapo kila taarifa ina umuhimu wake.

“Kwa hiyo pamoja na utabiri ule mkubwa unaotolewa lakini ni vizuri kufuatilia taarifa za kila siku kwani zinaweza kukuokoa na kukusaidia usifikwe na madhara yanayotokana na mvua hizi”, amesema Bi. Senga

Akizungumzia kuhusu hali ya mvua kwa mkoa wa Morogoro amesema maeneo ya Kaskazini ambayo yanapata mvua katika misimu miwili yaani msimu wa Vuli na Masika tayari mvua za vuli zimemalizika na kutakuwa na upungufu wa mvua kwa mwezi Februari kama ilivyotabiriwa hapo awali lakini wanatarajiwa vipindi vya mvua kuongezeka mwishoni mwa mwezi huu.

Amesema kwa maeneo ya Kusini mwa Morogoro ambayo yanapata mvua kwa msimu mmoja, mvua hizo zinaendelea kunyesha na utabiri unaonesha kuwa mvua hizo zilizoanza mwezi Novemba mwaka jana zitaendelea hadi mwezi April, 2024 ,

“Kama ilivyotabiriwa mwaka jana mvua hizo zinaendelea kunyesha na baadhi ya maeneo mvua hizo zimeambatana na ngurumo lakini maeneo mengine zinanyesha mvua za kawaida”, alisema Meneja huyo wa Hali ya hewa Kanda ya Mashariki.