SUA yaja na ufumbuzi wa soko la wakulima kidijitali

 

Na: George Alexander

Wataalam kutoka Chuo Kikuu cha Sokoine cha Kilimo (SUA) wamegundua mfumo mpya ambao utawawezesha wakulima na wafugaji wa kuku kupata masoko na kuuza kwa njia ya mtandao na kuwafikia watu wengi zaidi kwa urahisi.

Akizungumzia namna ya ufanyaji kazi wa mfumo huo Dkt. Sixbert Mourice ambaye ni Mhadhiri Mwandamizi kutoka Idara ya Mimea Vipando na Kilimo Bustani amebainisha kuwa mfugaji ataweza kupakua mfumo huo uliopo kwenye playstore ujulikanao kama E Kuku kwenye simu yake janja ya mkononi na kujiunga kwa ajili ya kuweza kuuza mayai na kuku kwa nchi nzima kwa urahisi.

Amesema mfugaji atapaswa kujisajili kwa namba ya simu ambayo imesajiliwa na ataingizwa kwenye mfumo ili aweze kuingiza bidhaa zake, na bidhaa hizo zitadumu kwa saa 24 baada ya huo muda bidhaa zitaondoka, hivyo itampa nafasi ya kuhariri baada ya kila saa 24 hii ni sambamba na kwenda na mabadiliko ya bei ya kila siku.

Pia ameongeza kuwa itarahisisha kwa mnunuaji kujua bei ya Mayai au Kuku kwa urahisi na kuepusha udanganyifu na usumbufu wakati wa ununuaji, na pia kupata bidhaa hiyo kwa urahisi kwa kumuwezesha mnunuaji kumfikia mzalishaji bila kupitia mtu mwingine wa kati.

Amebainisha kuwa kupitia mfumo huo kutakua na jukwaa maalum la mafunzo ambapo mtumiaji atajifunza vitu vingi juu ya ufugaji na utunzaji wa Kuku ikiwemo namna ya kuandaa mabanda na kukabiliana na magonjwa mbalimbali.

Hata hivyo kutakuwa na suala la Takwimu hivyo itaonesha bei ya bidhaa kwa kila wilaya ambapo kutakuwa na bei ya juu, bei ya chini, na bei ya wastani hivyo itampelekea mkulima kujua na kuuza bidhaa kwa bei ya usawa na sio kuuza kwa bei ambazo sio za kweli au sio za wakati huo, pia takwimu hizo zitasaidia pia kwenye tafiti mbalimbali.

Aidha ameeleza mfumo huo ni rahisi na ni rafiki kwa watumiaji, na kuwa wamehakikisha habari zote za Tanzania kuhusu masoko zitaonekana kuanzia Mkoa,Wilaya,Tarafa hadi ngazi ya chini hivyo amewataka wakulima kuchangamkia fursa hiyo kwa maana biashara sasa inahamia mtandaoni, na mfumo huo utatumika kama duka.

“Sekta ya Kilimo masoko yake yanayumbishwa sana na sio ya uhakika ndio maana wakulima wengi sio matajiri hivyo tukaangalia ni nini teknolojia inaweza ikasaidia kuhakikisha kwamba mkulima anapata masoko,  hawayumbishwi wanakuwa na uhakika ndio tukabuni huu mfumo ili uwasaidie hawa wakulima”, amesema Dkt. Sixbert.