Wakulima wanatakiwa kutambua wana haki kununua mbegu bora kuepuka changamoto

 

Na: Tatyana Celestine

Ili kuhakikisha mbegu itakayomfikia mkulima inakuwa bora na yenye tija kwa mkulima Taasisi ya Kuthibiti Ubora wa Mbegu Tanzania (TOSCI) imekuwa ikithibitisha na kudhibiti mbegu kwa asilimia 100 katika hatua mbalimbali.

                          

Akizungumza katika warsha ya mafunzo kwa waandishi wa habari mtoa mada ambaye ni Mkaguzi wa Serikali wa mbegu kutoka TOSCI  Bw. Joseph Ngura amesema kuwa mbegu zote zinazozalishwa na kutoka nje ya nchi lazima zithibitishwe na TOSCI na hii inawapa nafasi ya kuangamiza mbegu ambazo hazina ubora zinazoingia nchini pamoja na zile zinazozalishwa.

Amezitaja baadhi ya hatua ambazo mbegu hizo hupitia ni pamoja na kupimwa ubora wake, kuhakikisha inaishi kwa muda mrefu, kuhakikisha mbegu haijachakachuliwa na kuhakikisha inawekwa nembo ya ubora kutoka mamlaka iliyoidhinishwa na Serikali TBS.

Aidha ameongeza kuwa wakulima wanatakiwa kutambua wana haki katika kununua mbegu na anatakiwa akipata changamoto afuate utaratibu ili changamoto yake iweze kutatuliwa kama vile, mbegu kushindwa kuota, kuuziwa mbegu ilyopita muda wake, mbegu iliyooza pamoja na mbegu iliyozalishwa chini ya kiwango.

Kwa upande wake Mkaguzi kutoka TOSCI Morogoro Bi Nugwa Fortunatus amesema kuwa wauzaji wa mbegu, miche ya matunda wote ni lazima wapate mafunzo na wasajiliwe TOSCI ili waweze kuuza kwa wananchi .

Akizungumza suala la bei ya mbegu kuonekana ni kubwa kwa wakulima, Bi. Fortunatus amesema kuwa Serikali ya Tanzania ipo bega kwa bega na tayari imetoa bei elekezi ya mbegu kote nchini pamoja na kuendelea kufanyia kazi hata mkulima mdogo kabisa aweze kumudu bei elekezi apate mbegu bora.

Mafunzo hayo yamehusisha wanahabari Mkoani Morogoro ambao wamepata mafunzo kuhusiana na uthibiti na udhibiti wa mbegu bora ili kusaidia mkulima kufahamu haki zake na namna ya kupata mbegu bora kwa ajili ya kilimo.