SUA yawanoa wafugaji wa kuku kutoka mikoa mbalimbali

 

Na; Adam Maruma

Zaidi ya wafugaji 40 kutoka mikoa 8 ya Tanzania Bara wamenufaika na mafunzo ya ufugaji bora wa kuku yaliyoratibiwa na Taasisi ya Elimu ya Kujiendeleza (ICE) kutoka Chuo Kikuu cha Sokoine cha Kilimo (SUA) kwa ufadhili ya mradi wa Mabadiliko ya Elimu ya Juu Kiuchumi (HEET).

Mafunzo hayo ya siku 4 ni muendelezo wa mafunzo yanayotolewa na Taasisi hiyo kwa Wakulima nchini, ambao wamekuwa wakinufaika na elimu  inayotolewa kwa muda mfupi kwa makundi ya wakulima na wafugaji ili kuweza kufuga na kulima kitaalam na kuweza kunufaika na shughuli hizo kama sehemu ya kuwaongezea kipato.

Leokadia Mhapa ni mmoja wa washiriki wa mafunzo kutoka mkoa wa Morogoro amesema mafunzo hayo yatamuongezea maarifa zaidi kwa sababu  wameanzisha kikundi cha ufugaji wa kuku  kwa siku za karibuni hivyo mafunzo hayo yatawasaidia  katika mradi wao wa ufugaji wa kuku.

‘’Kwa kweli Mafunzo haya yatatusaidia sana kwa sababu mradi wetu wa ufugaji kuku ndio kwanza umeanza, nimejua namna ya kuwapa chanjo, namna ya kuwalisha na ujenzi wa mabanda bora, kwa kweli mafunzo haya yamekuja kwa wakati muafaka na tunaishukuru SUA kwa mafunzo haya’’, amesema Leokadia.

Mshiriki mwingine kutoka wilaya Gairo Peter Kihiyo amesema mafunzo hayo yamemuongezea uelewa wa usimamizi wa ufugaji kuku kwa sababu katika kuhakikisha usalama na upatikanaji wa chakula kwa wananchi, ufugaji wa kuku ni eneo muhimu katika kuwapatia wananchi protini, hivyo ufugaji wa kuku ni tasnia muhimu ndio maana yeye na wenzake wakaamua kuja kuongeza elimu zaidi ya ufugaji kuku.

‘’Nimekuja SUA na wenzangu kwa ajili ya mafunzo ya ufugaji bora wa kuku na hivyo uelewa wa usimamizi wa ufugaji wa kuku umeongezeka kwa sababu katika kilimo tunachokifanya Gairo kinachosimamiwa na Kanisa la KKKT ili kuwahakikishia wananchi usalama wa Chakula, ufugaji wa Kuku ni eneo  mojawapo la mradi wetu muhimu sana kwani inawapatia wananchi Protini pindi wanapotumia kitoweo cha kuku na hivyo mimi na wenzangu 4 tupo hapa ili kunufaika na elimu ya ufugaji bora wa kuku na hivyo tutakaporudi Gairo basi faida itaonekana’’, amesema Kihiyo.

Kwa upande wake Naibu Mratibu wa Mradi wa HEET Dkt. Winfred Mbungu amesema katika utekelezaji wa mradi huo, kuna maeneo 7 yanayotarajiwa kupitiwa na mradi huo, na eneo mojawapo ni ushirikiano kati ya vyuo vikuu na taasisi binafsi na vyuo hivyo,  SUA wameamua kuendelea kuwaelimisha wafugaji na wamekuwa wakifanya shughuli hiyo kwa muda mrefu na hivyo kwa sasa ni zamu ya wafugaji wa kuku ili waweze kufuga kisasa na kibiashara ikiwa ni muendelezo wa ufadhili wa mradi wa HEET.

 

Nae mwezeshaji wa mafunzo hayo Prof. Faustine Lekule, ambae ni Prof. mstaafu kutoka Idara ya Sayansi ya Wanyama SUA, ameupongeza mradi wa HEET ambao ndio wawezeshaji wa mafunzo hayo na kusema kitendo cha washiriki wa mafunzo hao kutoka mikoa 8 inaonesha mwamko wa watanzania kutaka kujifunza mambo mapya katika ufugaji wa kuku nchini.

Aidha Prof. huyo mbobezi wa masuala ya Sayansi ya Wanyama ameongeza kuwa ufugaji kuku ni tasnia ambayo mfugaji anaweza kuanza kidogo kidogo na hivyo hata mfugaji mdogo anaweza kuifanya shughuli hiyo na kufuga kwa tija na kuweza kumuinua kiuchumi.

Kwa mujibu wa takwimu ya Wizara ya Mifugo na Uvuvi, Tanzania inakadiriwa kuwa na idadi ya kuku milioni 92.8, kuku wa asili wakikadiriwa kuwa milioni 42.7 na kuku wa kisasa wakiwa milioni 50.1, hata hivyo kutokana na wafugaji wengi kufanya shughuli hiyo kimazoea imekuwa na mchango mdogo katika kuchangia pato la wafugaji na taifa kwa ujumla kutokana na changamoto ya maradhi yanayochangiwa na ukosefu wa elimu.