Vijana watakiwa kuchukulia tasnia ya ufugaji kuku kama ajira rasmi

 

Na: Adam Maruma

Vijana mkoani Morogoro wametakiwa kuiangalia tasnia ya ufugaji Kuku kama shughuli inayoweza kuwa suluhisho la tatizo la ajira nchini kutokana na urahisi wa kuanzisha mradi huo na kupata faida ndani ya muda mfupi tangu mradi kuanza.

Hayo yameelezwa na Shomari Mtandu ambaye ni mmoja wa wafugaji waliofanikiwa kutokana na ufugaji katika tasnia ya ufugaji kuku katika kata ya Kingolwira baada ya kutembelewa na washiriki wanaofanya mafunzo ya ufugaji bora wa kuku yaliyoandaliwa naTaasisi ya Elimu ya Kujiendeleza (ICE) kwa ufadhili wa mradi wa Mabadiliko ya Elimu ya Juu Kiuchumi  (HEET).

Mfugaji huyo amesema ufugaji wa kuku ni tofauti na shughuli zingine ambazo mchakato wa uanzishwaji huwa na mlolongo mrefu, lakini ufugaji wa kuku kinachotakiwa ni eneo na baadhi ya  vifaa muhimu na unaweza kuanza na kiasi chochote cha kuku huku ukiendelea kujifunza na kukuza biashara na matokeo huwa ni muda mfupi kwani kuku wa nyama wanaweza kuwa tayari kuuzwa baada ya wiki 4.

‘’Ufugaji kuku ni tofauti na shughuli kama duka la mahitaji ya nyumbani kwani utahitaji vitu vingi, kama leseni na kodi na mambo mengine, kwa ufugaji wa kuku kikubwa ni eneo na kuku wenyewe na mahitaji mengine ambayo hutegemeana na aina ya kuku na idadi ndio maana kuna watu wameanza na kuku 10 na sasa wana idadi kubwa sana ya kuku’’, amesema Shomari.

Ameongeza kuwa shughuli hiyo amekuwa akifanya kwa muda mrefu kwani wazazi wake ndio waanzilishi na yeye akajikuta anaungana nao baada ya kuona manufaa kutokana na ufugaji huo ambao kwa sasa wamekuwa wakiuza mayai na nyama jijini Dar es Salaam kwa kuwa ana miliki kuku zaidi ya 2,000 kwenye mabanda yake wenye ukubwa tofauti.

Kwa upande wake mfugaji  mwingine,anayejulikana kama Mama Ado  ambaye  pia ana mradi wa ufugaji kuku amesema pamoja na changamoto za bei kubwa ya chakula cha kuku, lakini amemudu kuendesha maisha ya familia yake kutokana na ufugaji huo, na ameshukuru kwa kutembelewa na wafugaji wengine kwani imemuongezea ari ya kujituma zaidi katika ufugaji kuku.

‘’Ufugaji kwa siku za mwanzo unakuwa na changamoto hasa kwenye chakula cha kuku kwani bei zinakuwa kubwa na kama utakuwa huna elimu ya namna ya kuwalisha vizuri, unaweza kujikuta unapata hasara sana lakini nimefurahi kwa ugeni huu wa wafugaji hawa, imeniongezea ari zaidi ya kufuga na siku nyingine mkija mtanikuta na idadi kubwa zaidi ya hawa, nawashukuru SUA kwa kuchagua eneo langu kama sehemu ya kujifunza kivitendo’’, amesema mama Ado.

Kwa mujibu wa Dk. Juma Yusuph ambaye ni mmoja wa wawezeshaji  wa  mafunzo hayo, Kata ya Kingolwira ni miongoni mwa kata iliyo na mwamko wa ufugaji kuku huku kata hiyo ikiwa na zaidi ya wafugaji 25 ambao wanafuga katika maeneo wanayoishi na amekuwa akiwatembelea na kuwapa huduma za ugani.