SUA Media yashiriki Mkutano wa Mwaka wa Vyombo vya Utangazaji nchini

 

Na: Farida Mkongwe

Rai imetolewa kwa vyombo vya habari nchini kuwa na vipindi maalum vitakavyohamasisha jamii kuzijua mila na desturi za kitanzania ili kujenga taifa lenye maadili na uzalendo ambao ndio chachu ya maendeleo ya taifa.

Kauli hiyo imetolewa Februari 13, 2024 na Naibu Waziri wa Habari, Mawasiliano na Teknolojia ya Habari Mhandisi Kundo Mathew wakati akifungua Mkutano wa Mwaka wa Vyombo vya Utangazaji nchini ikiwemo unaofanyika jijini Dodoma.

Mhandisi Mathew amesema pamoja na mafanikio makubwa yanayotokana na uwepo wa vyombo vya habari kuweza kuifikia jamii kirahisi zaidi lakini kumekuwa na changamoto ya baadhi ya vyombo hivyo kukiuka kanuni za utangazaji hali inayochangia kuwepo kwa mmomonyoko wa maadili nchini.

 “Sekta ya habari imekumbwa na mabadiliko ya Teknolojia na hivyo kuathirika na utandawazi uliopo, sisi sio kisiwa lakini pamoja na hayo Serikali inaendelea kufuatilia na kuchukua hatua stahiki ikiwa ni sanjari na kutoa elimu kwa vyombo hivyo ili kukabiliana na changamoto zinazotokana na mabadiliko hayo ya teknolojia”, amesema Mhandisi Mathew.

Katika hatua nyingine Naibu Waziri huyo amewataka washiriki waliohudhuria mkutano huo kuzielewa ipasavyo Kanuni za uchaguzi zinazotumika nchini ili uchaguzi wa Serikali za Mitaa unaotarajiwa kufanyika mwishoni mwa mwaka huu pamoja na Uchaguzi Mkuu utakaofanyika mwakani uwe wa amani na mafanikio makubwa.

Miongoni mwa mada zinazojadiliwa katika mkutano huo ni Hali ya Maadili na Matumizi ya Taaluma ya Utangazaji nchini, Hali ya Maadili na Matumizi ya Taaluma ya Utangazaji kwenye mitandao ya kijamii, Matumizi bora ya mitandao ya kijamii kwa watengeneza maudhui, pamoja na matumizi ya kazi za Sanaa na Filamu kwenye vyombo vya Utangazaji.

SUA Media imeshiriki katika Mkutano huo unaofanyika kwa siku mbili jijini Dodoma ambao umebeba Kauli Mbiu isemayo “ Maadili na Taaluma ya Utangazaji".