SUA yaendelea kufanya maboresho ya Mitaala yake ya Elimu.

 Na: Winfrida Nicolaus

Ndaki ya Tiba ya Wanyama na Sayansi Shirikishi pamoja na Idara ya Sayansi ya Wanyama ya Chuo Kikuu cha Sokoine cha Kilimo (SUA) kwa kushirikiana na wadau toka taasisi mbalimbali nchini wameombwa kufanya maboresho ya Mitaala yatakayo muwezesha muhitimu kutoka SUA kwenda kuwa bidhaa ya kibiashara yenye kukidhi soko la ajira licha ya ugumu wa kozi wanazozichukua.

Naibu Makamu Mkuu wa Chuo Taaluma, Utafiti na Ushauri wa Kitaalam SUA Prof. Maulid Mwatawala waliyekaa (katikati) akiwa katika picha ya pamoja na wadau walioshiriki katika zoezi la kuboresha Mitaala, wa pili kutoka kushoto (waliokaa) ni Rasi wa Ndaki ya Tiba ya Wanyama na Sayansi Shilikishi SUA Prof. Esron Karimuribo

Hayo yamesemwa na Naibu Makamu Mkuu wa Chuo Taaluma, Utafiti na Ushauri wa Kitaalam SUA Prof. Maulid Mwatawala wakati akifungua mkutano maalumu wa wadau kutoka taasisi mbalimbali waliokutana kufanya mapitio ya maboresho ya Mitaala iliyotengenezwa na Ndaki ya Tiba ya Wanyama na Sayansi Shirikishi pamoja na Idara ya Sayansi ya Wanyama kwa kuangali kama inafikia malengo na matarajio ya wanafunzi wao katika kujiajiri au katika ya soko la ajira.

Amesema kutokana na wadau wengi kwenye soko la ajira kutegemea bidhaa zinazozalishwa na chuo hicho ni muhimu kuangalia kama Mitaala wanayoiboresha inamuwezesha muhitimu kutoka SUA kuajirika kwa maana ya Kozi wanazozitoa zibebe vipengele vya kibiashara vitakavyomuwezesha muhitimu kutoka SUA kuweza kuajirika kirahisi vilevile kuhakikisha harakati za mwanafunzi kupelekea kutimiza malengo yake na kuhakikisha ubora wa wanachozalisha unabaki palepale.

“Ni shauku yetu kuona wahitimu wetu wanatoka chuoni kwetu kwenda kwenye soko la ajira wakiwa wabobezi katika maeneo husika kama ikiwezekana hasa katika Sayansi ya Wanyama ndio maana tupo na hawa wadau watakao tusaidia kututoa kwenye mkwamo wa ajira huko nje kuhusiana na ubobezi wa kitu wanachohitaji hivyo tujaribu kutengeneza ubobevu kwa kile tunachokizalisha ili watakapohitajika wabobevu kwenye maeneo husika wapatikane kwa urahisi”, alisema Prof. Mwatawala

Kwa upande wake Rasi wa Ndaki ya Tiba ya Wanyama na Sayansi Shilikishi SUA Prof. Esron Karimuribo, amesema wanacholenga ni kuhakikisha Mitaala yao inaweza kuakisi hali halisi ya muhitimu anapomaliza elimu ya Chuo Kikuu kuweza kuwa na uwezo wa kupata kazi kwa haraka iwe kwa kuajiriwa au kujiajiri hivyo wanahitaji elimu ambayo wadau wao ambao ni wanafunzi watakayoipata ichangie katika kuhamasisha ukuaji wa uchumi wa nchi.

Aidha amesema wameamua kuleta zoezi hilo ambalo limewashirikisha wadau ili kuwapa maoni juu ya namna ya kuboresha Mitaala hiyo na kisha wataiwasilisha kwenye Seneti ya chuo na baadae kupata uthibiti wa Tume ya Vyuo Vikuu ili wanapoanza kuitumia iweze kuleta matokeo chanya katika kutoa ajira pamoja na mchango mkubwa kwenye uchumi wa nchi hivyo ameishukuru Serikali ya Tanzania kwa kufadhili zoezi hilo kupitia mkopo kutoka Benki ya dunia kwenye Mradi wa HEET. 

Naye Prof. Robinson Mdegela Mhadhiri Mwandamizi kutoka Ndaki ya Tiba ya Wanyama na Sayansi Shirikishi, Idara ya Tiba ya Wanyama na Afya ya Jamii SUA amesema kwa sasa chuo chao kinafanya kazi kubwa katika Mradi wa HEET wa kuhakikisha kuwa wanakuwa na Mitaala inayojitosheleza na kujibu mahitaji ya wanafunzi wao wa sasa na watakaokuja  baadae pamoja na waajiri na hasa inapozingatiwa kuwa wapo katika hatua ya sita kwa mapinduzi ya viwanda nchini.

“Tuna Mitaala zaidi ya ishirini na tatu (23) kwa upande wa Tiba ya Wanyama na Sayansi Shilikishi na upande wa Sayansi ya Wanyama na hiyo Mitaala yetu imetengenezwa  na wataalamu wetu tulio nao, ukitaka Mtaala uwe na Tija ni lazima uite wadau  watakao kupatia mawazo ya kitu gani kinatakiwa kufanyika ili Mitaala yetu kuuzika na kuwa  maana zaidi”, alisema Prof. Megela

Aidha amesema kumekuwa na ushirikianao mkubwa  kutoka kwa wadau na wamepata ushauri mzuri utakaowasaidia kuboresha Mitaala na kufanya vijana wao waweze kuajirika na kukubalika katika soko la ajira lililopo nje ya chuo.

Naye Rais wa wanafunzi wa Tiba ya Wanyama Tanzania Bw. Samwel Nyambasoba ambaye pia ni mwakilishi wa wanafunzi wa Tiba ya Wanyama SUA amesema manufaa makubwa ya zoezi hilo ni kuwa Mitaala hiyo inalenga kutengeneza wahitimu watakaoenda kuuzika kwenye soko la ajira wakiwa na ujuzi ambao unahitajika kuendana na mabadiliko ya Kiteknolojia lakini pia mifumo ya kijamii hivyo lengo la kuhusishwa kwa wadau mbalimbali katika zoezi hilo ni kuweza kupata maoni ya pamoja ambayo yanalenga kuleta mabadiliko kwenye sekta ya uchumi na kijamii.

Wadau mbalimbali kutoka Sekta za Viwanda walioshiriki katika zoezi hilo la uboreshaji wa Mitaala ni pamoja na washauri wa Sekta ya Viwanda katika ngazi ya taifa, waajiri upande wa Sekta Binafsi pamoja na Sekta za Umma, wanafunzi wanaosoma Shahada ya Kwanza naya Pili, wasimamizi wa mafunzo wanayoyatoa (Professionals Bodies) pamoja na vyama vinavyoajiri wahitimu wao katika sehemu mbalimbali.