SUA yafurahishwa na maoni ya wadau uboreshaji wa Mitaala

 Na: Ayoub Mwigune

Katika kuhakikisha wahitimu wa Chuo Kikuu cha Sokoine cha Kilimo (SUA) wanakidhi mahitaji ya soko la ajira sambamba na kuwa na ujuzi utakaowasaidia kuweza kujiajiri, Ndaki ya Kilimo ya SUA imekutana na Wadau mbalimbali kutoka sekta tofautitofauti zikiwemo za Umma na Binafsi ili kupitia na kufanya maboresho  na kukuza Mitaala yake. 

Wadau mbalimbali wakiwa katika mkutano wa kuboresha Mitaala

Akizungumza na SUA Media katika mkutano huo Rasi wa Ndaki ya Kilimo SUA Dkt. Nyambilila Amuri wameona ni vyema kukutana na wadau mbalimbali ili kuboresha na kuhuisha Mitaala hiyo ili kwenda sambamba na  mapendekezo yaliyotolewa.

Rasi wa Ndaki ya Kilimo SUA Dkt. Nyambilila Amuri (wa nne kutoka kushoto mstali wa mbele) akiwa katika picha ya pamoja na wadau

Dkt. Nyambilila amesema lengo kubwa la kuwakusanya wadau hao ni kuweza kupata maoni na kupata mrejesho kutoka kwao ya matarajio ya wahitimu watakaoenda kutengenezwa kutokana na Mitaala hiyo na kudumisha ubora wa wahitimu lakini pia kuhakikisha wahitimu hao wanakidhi mategemeo ya soko la ajira na wale watakaojiajiri ikiwa ni pamoja na watakaoanzisha biashara kilimo.

“Tumepitia na tumeweza kupata maoni kwenye Programu nne za Shahada za Awali……., umetuwezesha kupata maoni mazuri ambayo yatatusaidia kuboresha Mitaalala yetu lakini zaidi ya hapo pia tuna Mitaala ya Program za Uzamili ambazo zimejadiliwa kwenye kikao hicho zinafikia kumi lakini pia kuna zile za Umahili pamoja na Uzamivu”, alisema Dkt. Nyambilila.

Kwa upande wake Mhandisi wa Umwagiliaji Bw. Emanuel Mnyanye Mtumishi kutoka Halmashauri ya Wilaya ya Morogoro amesema lengo la kukutana kwao katika uboreshaji wa Mitaala SUA ni kusikiliza na kutoa maoni yao kwa lengo la kupata wahitimu bora watakaoweza kuwasaidia utendaji wa kazi katika kukuza Uchumi wa nchi pamoja na uzalishaji kwa ujumla.

Amesema wameona ni vyema wakajikita kutoka kwenye uelewa kinadharia na kwenda kwenye ujuzi ambapo utawafanya wahitimu wengi kutoka SUA wakiwa na ujuzi ambao wataenda kuuwekeza kwa wakulima na kupata matokeo chanya, vilevile kutoka chuoni wakiwa na uwezo wa kujitegemea wenyewe kutokana na uwezo wao wa kufanya kazi lakini pia kuajirika kimataifa.

Naye Bi. Given Msomba kutoka Chuo Kikuu cha Iringa mmoja wa wadau aliyeshiriki katika mkutano huo wa uboreshaji wa Mitaala ya Ndaki ya Kilimo SUA amesema imekuwa ni nia ya Serikali pamoja na wadau mbalimbali kuwa wawe na Mitaala ambayo inakidhi kiwango cha wadau vilevile itakayowasaidia wanafunzi kupata utaalamu wa kuweza kufanya kazi sehemu mbalimbali ndani nan je ya nchi.