Mfumo mpya wa Kidijitali wa Malipo wawasaidia Wanafunzi SUA kupata fedha kwa wakati

 

Na; Godfrey Msinjili                                             

Wanafunzi wa Chuo Kikuu cha Sokoine cha Kilimo (SUA) wameishukuru Bodi ya Mikopo kwa kuwarahisishia kupata fedha za kujikimu na matumizi kwa wakati kutoka Bodi ya Mikopo ya Wanafunzi wa Elimu ya Juu (HESLB) ambapo imewezesha wanafunzi hao kuendelea na masomo kwa wakati Chuoni hapo.

Akizungumza na SUA Media katika mahojiano yaliyofanyika Chuoni hapo, Mhasibu na Afisa Mikopo wa Dawati la Mikopo la Elimu ya Juu kutoka SUA Frida Malya, amesema wanaendelea na zoezi la kuwasajili wanafunzi wanufaika katika Mfumo mpya wa Kidijitali wa Malipo (Digital Disbursement Solution – DiDiS ) wakisaidiana na Maafisa kutoka Bodi ya Mikopo ya Wanafunzi wa Elimu ya Juu.

Aidha Malya amesema kuwa mfumo huo ulioboreshwa utasaidia wanufaika kuachana na mfumo wa kusaini pesa kwenye makaratasi badala yake watapata fedha za kujikimu ndani ya saa 24 baada ya kutumiwa ujumbe wa kuingiziwa pesa kutoka Bodi ya Mikopo.

Amefafanua kuwa mnufaika ataweza kutumia simu yake kupakua fedha akiwa mita 100 kutoka Jengo la Utawala na kuongeza kuwa mfumo huo utasaidia wanafunzi kupata  mahitaji muhimu na kupata muda mzuri wa kuendelea na masomo mapema.

Kwa upande wake Afisa Mikopo Daraja la Pili kutoka HESLB Edward Kilele ameeleza kuwa mfumo huu wa DiDiS ni mfumo wa Kidigitali ambapo mnufaika atatumia mfumo wa Student’s Individual Permanent Account (SIPA) kuangalia mgawanyo, na itasaidia  kupunguza adha ya foleni kwa wanafunzi, pia itasaidia Bodi ya Mikopo kufanya ufuatiliaji wa fedha hizo na amesema kuwa wanafunzi wanaweza kupata fedha kwa kupakuwa application ya Bodi ya Mikopo ya Elimu ya juu yaani  ‘HESLB App’.

"Tunaishukuru sana Serikali kwa ufadhili huu wa fedha pia naishukuru Bodi ya Mikopo kwa kugundua mfumo mpya wa DiDiS ambao umerahisisha kupata fedha za kujikimu na matumizi kwa urahisi tofauti na zamani ambapo pesa zikitoka tunapanga foleni, lakini kwa sasa tunaweza kupata fedha popote tulipo na kwa wakati, pia nawashauri wanafunzi wenzangu tutumie fedha vizuri ili tuendelee kufaidika na ufadhili huu",  alisema Albertina Kihundwa, Mwanafunzi wa Mwaka wa Pili wa Stashahada ya Kwanza ya Udaktari wa Wanyama Chuo cha SUA.

Kwa upande wao Ruth Msechu, anayesoma Kozi ya Kilimo na Antony Michael Kozi ya Shahada ya Uuguzi wa Wanyama wote wakiwa ni wanafunzi wa mwaka wa pili SUA wameishukuru Serikali kupitia Bodi ya Mikopo kwa kuruhusu mfumo huo mpya ambao umesaidia wanafunzi kujihudumia wenyewe na hivyo kuwawezesha kuanza masomo kwa wakati.

Mfumo huu wa DiDiS unalenga kusajili wanafunzi waliopata mkopo kwa mara ya kwanza katika mwaka wa masomo 2022/2023 waliopo katika Taasisi zote za Elimu ya Juu nchini, usajili utakapokamilika wanafunzi wote wanufaika wa mikopo waliopo vyuoni  wapatao 202,016 watakuwa wanapokea fedha kupitia DiDiS.