Wanafunzi wapelekwe kwenye ziara za mafunzo vyuoni waweze kuchagua taaluma za kusoma.

 Na: Hadija Zahoro – Morogoro.

Wamilki,wasimamizi pamoja na walimu wa shule mbalimbali  nchini wameshauriwa  kujenga tabia ya kuwapeleka  wanafunzi kufanya ziara vyuoni kama sehemu ya kuwapa ufahamu na uwezo wa kuchagua kozi ya kusoma mara baada ya kuhitmu elimu ya Sekondari.

Picha ya Wanafunzi hao wakiwa kwenye kitengo cha ufugaji wa viumbe maji

Ushauri huo umetolewa na Mshauri wa wanafunzi wa Shule ya Sekondari ya Wasichana Sega, Pauline Rusisye, amesema hayo wakati wa ziara ya wanafunzi wa shule hiyo walipotembelea Chuo Kikuu cha Sokoine cha Kilimo (SUA) ili kujifunza masomo ya sayansi yanayofundishwa chuoni hapo.

Ameeleza kuwa wao kama Sega wameamua kuwaleta wanafunzi hao wa michepuo ya Sayansi ili kuwaonesha fursa zinazopatikana chuoni hapo hivyo, itawajengea wao kuona uhalisia unaofanyika kulingana na kozi inayosomwa.

‘‘Watoto wanasema wanataka kuwa madaktari wa mifugo, ili uwe daktari wa mifugo unatakiwa ufanye nini na wanaosomea kozi hiyo wanafanya vitu gani uhalisia wake upoje na ndiyo maana wamekuja hapa ili kujifunza mambo ya afya wanyama pamoja na kilimo’’.Anasema Bi.Rusisye

‘‘Mbali na hapo  wametoka Chuo Kikuu cha Muhimbili kujifunza Mambo ya afya ya Binadamu,chuo kikuu cha Dar es salaam kujifunza mambo ya uhandisi na mambo yote yanayohusiana na sayansi hivyo kama mtoto akimaliza hapo anajua kabisa akimaliza na akaenda SUA au Muhimbili anajua anaenda kusoma Kozi gani kulingana na Mchepuo anaousomea’’.Anaeleza Bi. Rusisye

Bi. Rusisye ameeleza kuwa kulingana na dunia ya sasa kubadilika, amewaasa walimu kuweka mambo wazi kwani mwanafunzi akijionea mwenyewe anapata ujasiri wa kumwelezea mzazi kitu anachotaka kusomea na kina maana gani hivyo, safari hiyo ni muhimu katika masomo ya watoto.

Amesema mbali na hapo wametoka Chuo Kikuu cha Muhimbili kujifunza Mambo ya afya ya Binadamu,chuo kikuu cha Dar es salaam kujifunza elimu ya uhandisi na  yote yanayohusiana na sayansi hivyo kama mtoto akimaliza hapo anajua akaenda SUA au Muhimbili anajua anaenda kusoma Kozi gani kulingana na Mchepuo anaousomea.

Kwa upande wake Mtaalamu wa Maabara ya Sayansi ya Udongo SUA,  Mohamed Mohamed ameeleza kuwa kutokana na Wanafunzi waliofika SUA  kujifunza kwa vitendo  anatarajia kuwepo kwa ongezeko la Wanafunzi wakati wa usajili unaofuata  kwani wamepata ufafanuzi mkubwa wa kile kinachofanyika katika maabara hiyo.

Amesema kuwa kutokana na elimu waliyoipata wanafunzi hao anaamini kuwa wataenda kuwashauri ndugu, jamii na marafiki zao waje kufanya utafiti wa mashamba yao pamoja na kusoma kozi ya kilimo inayofundishwa chuoni hapo.

Kwa upande wao Wanafunzi wa Shule ya Sekondari ya Wasichana Sega, Rebecca James na Grace Charles wameeleza kuwa mbali na kutazama katika Runinga za Wanyama, hawakuwahi kushuhudia uhalisia wa namna ya wanavyotibiwa katika hospitali zao lakini kupitia SUA, wameweza kuona na wanatamani kwenda kusomea kozi hiyo katika Chuo hicho.

Katika ziara hiyo ya Wanafunzi hao wa kidato cha nne mchepuo wa Sayansi, wameweza kutembelea Ndaki ya Kilimo katika Maabara ya Sayansi ya udongo, Hospitali ya Rufaa ya Wanyama, Kitengo cha Bustani, Idara ya Sayansi ya Wanyama, Viumbe Maji na Malisho pamoja na Shamba la Malisho katika Shamba la Mfano lilipo Magadu.

BAADHI YA PICHA ZA WANAFUNZI HAO WAKITEMBELEA MAENEO MBALIMBALI YA CHUO.