Kamati ya Bunge yaishauri Serikali kuiwezesha (TBS) ili itimize majukumu yake kikamilifu.

 Na: Amina Hezron,Dodoma

Kamati ya kudumu ya Bunge ya Viwanda Biashara, Kilimo na Mifugo  imeishauri Serikali kuiongezea uwezo kifedha,rasilimali watu na vitendea kazi Shirika la Viwango Tanzania (TBS) ili iweze idhibiti bidhaa zisizo na ubora zinazoingia nchini kwa wingi na kuleta athari kwa watumiaji.

Mwenyekiti wa kamati ya kudumu ya Bunge Mhe. Mariamu Ditopile Mzuzuri.

Hayo yameelezwa leo jijini Dodoma na Mwenyekiti wa kamati ya kudumu ya Bunge Mhe. Mariamu Ditopile Mzuzuri alipokuwa akisoma Taarifa ya kamati ya kudumu ya bunge ya Viwanda Biashara Kilimo na Mifugo kuhusu utekelezaji wa majukumu ya Wizara ya Uwekezaji, Viwanda na Biashara pamoja na maoni ya kamati kuhusu makadilio ya mapato na matumizi ya fungu 44 kwa mwaka wa fedha 2023/2024.

Amesema swala la uingizaji wa bidhaa za chakula nchini limepata sura tofauti kutokana na hali ilivyo duniani ambapo baadhi ya wafanya biashara wamekosa uaminifu na kutengeneza vyakula visivyo salama.

“Tumeona kwenye mitandao mchele usio salama wa plastic ukitengenezwa na kuonekana kama mchele halisi hali hii inatisha usalama wa wananchi wetu”, alisema Mhe. Mzuzuri.

Hivyo kamati imeomba sekta za uzalishaji wa bidhaa za viwandani na mazao yatokanayo na kilimo nchini ziwezeshwe kuzalisha kwa wingi ili kujitosheleza kwa chakula na kupunguza uingizaji wa bidhaa hizo na kuhakikisha bidhaa zote za chakula zinazoingizwa nchini zina ubora stahiki kwa usalama wa walaji.