Wakulima nchini Tanzania watakiwa kuzalisha mazao kwa kuzingatia mahitaji na vigezo vya soko.

 Na: Amina Hezron, Kilimanjaro.

Imebainika kuwa kanuni, Sera, Masharti na vigezo vinavyowekwa kwenye Soko la dunia na wanunuzi wengine hususani nchi za Ulaya ndio sababu kuu ya Mazao mengi ya wakulima nchini kutosafirishwa kuuzwa nje na kupata faida kubwa.

Prof. Reuben Kadigi ambaye ni Mtafiti Mkuu wa Mradi wa Utafiti wa Biashaara, Maendeleo na Mazingira (TRADE Hub) akizungumza mbele ya wadau wa mradi huo Mjini Moshi Mkoani Kilimanjaro.

Hayo yamebainishwa kwenye warsha ya wadau na Prof. Reuben Kadigi ambaye ni Mtafiti Mkuu wa Mradi wa Utafiti wa Biashaara, Maendeleo na Mazingira (TRADE Hub) wakati akieleza matokeo ya jumla ya Mradi huo unaotekelezwa na Chuo Kikuu cha Sokoine ha Kilimo (SUA) nchini Tanzania na kwenye  nchi zingine 15  za Afrika, Asia, Uingereza na Brazil.

“Wahitaji wanunuzi wa  bidhaa zetu wanaenda wanabadirika wakiweka vigezo kanuni na sheria mbalimbali zinazotakiwa kuzingatiwa wakati wa uzalishaji ikiwemo uzalishaji unaolinda mazingira, haki kwa wafanyakazi kwenye kuzalisha zao hilo na mengine mengi ambayo ukiangalia kwa nchi yetu na nchi nyingi zinazoendelea hiyo inakuwa kikwazo kikubwa hivyo lazima nchi yetu tujipange kutimiza vigezo hivyo ili tunufaike”,alieleza Prof. Kadigi.

Aidha amesema kufuatia changamoto hiyo nchi nyingi zinashindwa kufikia vigezo hivyo na kupelekea pale wanapokwenda kuuza kwenye mataifa hayo mazao na bidhaa zao zinakuwa na ushindani mkubwa kwakuwa kuna watu wanaojitangaza zaidi huko na wameweza kukidhi viwango hivyo vinavyotakiwa na soko.

Mtafiti huyo Mkuu wa Mradi wa TRADE HUB amesema jitihada za pamoja  zinatakiwa kati ya Serikali,Wakulima na Makampuni makubwa ambayo yanasafirisha Mazao nje ya nchi kuwakingia mgongo wakulima wa Tanzania kwa kuwasaidia kufikia vigezo kwakuwa ili kutambuliwa pia kuna gharama kubwa ambazo wakulima wadogo na vyama vya ushirika haviwezi kumudu.

Kwa upande wake Mtafiti Mkuu wa Mradi huo kutoka Programu ya Mazingira ya Umoja wa Mataifa (UNEP) katika kituo cha Dunia cha Ufatiliaji wa Uhifadhi (WCMC) Prof. Neil Burgess amesema mradi huo unafanya utafiti kuangalia Biashara, Maendeleo na Mazingira ya mazao ya Kilimo na Wanyamapori katika nchi washiriki.

Prof. Neil Burgess Mtafiti Mkuu wa Mradi huo kutoka Programu ya Mazingira ya Umoja wa Mataifa (UNEP) katika kituo cha Dunia cha Ufatiliaji wa Uhifadhi.

“Huu ni mradi wa utafiti wa kimataifa unaoangalia sera za kimataifa za biashara, Usimamizi wa bishara na Kanuni za biashara lakini pia faida na hasara za kanuni zilizowekwa kimataifa kwenye biashara mfano mzuri ni hizi za Umoja wa Ulaya ambazo zinaonekana kuathiri nchi nyingi zinazoendelea”, alifafanua Prof. Burgess.

Amesema kazi field na kukusanya taarifa zimemalizika na sasa wameweka nguvu katika kuandika matokeo kwa kufanya utambuzi wa kina ili kupata kitu ambacho kitakuwa na faida kutumika kwa taifa, Watunga sera na Wakulima ambao wanaguswa na mifumo mbalimbali ya uzalishaji.

Mradi wa Utafiti wa Biashara,Maendelo na Mazingira (TRADE Hub)ni mradi wa miaka mitano unaotekelezwa na Chuo Kikuu cha Sokoine cha Kilimo (SUA) kwa kushirikiana Taasisi zingine zaidi ya 50 duniani na kutoka katika nchi 15  za Afrika, Asia, Uingereza na Brazil na kufadhiliwa na Mfuko wa Utafiti wa Changamoto za Kidunia wa Serikali ya Uingereza (UKGCRF) na Mfuko wa Pamoja wa Utafiti na Ubunifu (UKRI).

Wadau wa Soya,Wanyamapori.Kahawa na miwa kutoka kwenye taasisi binafsi na za Serikali nchi nzima wakiwa kwenye picha ya pamoja mara baada ya kufunguliwa kwa warsha hiyo Jijini Moshi Mkoani Kilimanjaro.

Wadau wakifuatilia mawasilisho na matokeo ya utafiti huo.