Wabunifu, matarajio ya wananchi ni makubwa - Prof. Mwatawala

 

Na: Gerald Lwomile, Dodoma

Naibu Makamu Mkuu wa Chuo Taaluma, Utafiti na Ushauri wa Kitaalam Chuo Kikuu cha Sokoine cha Kilimo (SUA) Prof. Maulid Mwatawala ametoa rai kwa wabunifu wa Vyuo Vikuu nchini wakiwemo wa SUA kuhakikisha wanakuwa na ubunifu wenye viwango vya juu.

Naibu Makamu Mkuu wa Chuo Taaluma, Utafiti na Ushauri wa Kitaalam SUA Prof. Maulid Mwatawala akisisitiza jambo wakati akiongea na wabunifu kutoka SUA hawapo pichani (Picha zote na Gerald Lwomile)

Prof. Mwatawala ametoa rai hiyo Aprili 28, 2023 wakati akizungumza na wabunifu kutoa SUA kwenye maonesho ya Wiki ya Ubunifu 2023 yanayofanyika katika uwanja wa Jamhuri jijini Dodoma.

Amesema kuwa ubunifu uko katika ngazi mbalimbali kuanzia kwa wananchi wa kawaida, Vyuo vya Kati na Vyuo vya Juu, hivyo matarajio ya wananchi wengi ni kupata matokeo mazuri zaidi ya bunifu kutoka vyuo vya juu.

“Sisi tunatakiwa kwenda kiwango cha juu zaidi cha ubunifu, kwa mfano mtu anabuni kitambaa cha nguo ahakikishe mchanganyiko wa malighafi kama pamba na siliki katika nguo hiyo unaweza kumsaidia mtu kujua kitambaa cha nguo hiyo kinaweza kuvaliwa wakati gani” amesema Prof. Mwatawala

Wakati huo huo Mbunge wa Iringa Mjini Mhe. Jesca Msambatavangu aliyepata muda wa kutembelea banda la SUA amewapongeza watafiti katika chuo hicho kwa kazi nzuri wanayoifanya.

Mbunge wa Iringa Mjini Mhe. Jesca Msambatavangu (aliyevaa kombati katikati) akiwa katika picha ya pamoja na wabunifu kutoka SUA

Amesema matunda ya tafiti mbalimbali zinazofanywa katika chuo hicho yameendelea kuonekana katika maeneo mbalimbali ikiwa ni pamoja na mkoani Iringa ambako tafiti kadhaa zimefanyika.

Chuo Kikuu cha Sokoine cha Kilimo kimefanya tafiti mbalimbali Mkoani Iringa ikiwemo utafiti wa kudhibiti mlipuko wa panya ambao walikuwa wakileta hasara ya asilimia 100 kwa kula mazao ya wakulima katika maeneo mbalimbali kama Uyole, Mkungugu, Isimani na Izazi.

Katibu Mkuu Wizara ya Elimu, Sayansi na Teknolojia Prof. Carolyne Nombo (aliyekaa katikati) akiwa amekaa katika Sebule bunifu ya Chuo Kikuu cha Sokoine cha Kilimo iliyobuniwa kwa kutumia mapipa na matairi chakavu na kuongezewa thamani  wa pili kulia ni Prof. Mwatawala na wa tatu kulia ni Prof. Maulilio Kipanyula Mkurugenzi wa Sayansi, Teknoljia na Ubunifu katika Wizara ya Elimu, Sayansi na Teknolojia

 

Msanii maarufu nchini Mrisho Mpoto maarufu kama Mjomba (mwenye rasta) akisikiliza maelezo ya ubunifu

Naibu Makamu Mkuu wa Chuo Kikuu cha Nelson Mandela upande wa Utawala, Fedha na Mipango Prof. Suzan Augustino kulia akifurahia bunifu mbalimbali za SUA

Naibu Makamu Mkuu wa Chuo Taaluma, Utafiti na Ushauri wa Kitaalam SUA (kulia) akiwa katika picha ya pamoja na Mkurugenzi Mkuu wa Shirika la Utafiti na Maendeleo ya Viwanda Prof. Madundo Mtambo (wa pili kulia)

Naibu Makamu Mkuu wa Chuo Taaluma, Utafiti na Ushauri wa Kitaalam SUA (kulia) akizungumza na Naibu Makamu Mkuu wa Chuo Kikuu cha Nelson Mandela upande wa Utawala, Fedha na Mipango Prof. Suzan Augustino 

Naibu Makamu Mkuu wa Chuo Taaluma, Utafiti na Ushauri wa Kitaalam SUA (kushoto) akimsikiliza mbunifu kutoka SUA

Bi.Theresia Temu kutoka SUA akiwa amembeba panya anayeweza kutambua eneo ambalo limetegwa bomu au makohozi yenye vimelea vya Kifua Kikuu