SUA itatatua changamoto ya malisho nchini - Mbunge wa Muleba Kaskazini Mhe. Mwijage

Na: Gerald Lwomile, Dodoma

Wananchi na viongozi mbalimbali walio jitokeza kwenye Maonesho ya Ubunifu 2023 katika uwanja wa Jamhuri jijini Dodoma, wamekipongeza Chuo Kikuu cha Sokoine cha Kilimo (SUA) kwa kusaidia kutatua changamoto mbalimbali katika sekta ya Kilimo kupitia teknologia walizo zigundua chuoni hapo.

Mbunge wa Jimbo la Muleba Kaskazini na Waziri wa zamani wa Viwanda na Biashara Mhe. Charles Mwijage (kulia) akisisitiza jambo kwenye banda la SUA katikati ni Prof. Abdul Katakweba na kulia ni Bi. Lucie Madalla wote kutoka SUA (Picha zote na Gerald Lwomile)

Mnamo Aprili 26, 2023, Mbunge wa Jimbo la Muleba Kaskazini na Waziri wa zamani wa Viwanda na Biashara Mhe. Charles Mwijage mara baada ya kutembelea Banda la SUA, amesema wakulima wengi wamekuwa wakipata changamoto za magonjwa ya mimea na wanyama na kukosekana kwa malisho ya kutosha kwa wanyama.

Amesema utatuzi wa changamoto hizo limekuwa siyo jambo rahisi hivyo tafiti zinazofanywa na SUA zinasaidia katika kuhakikisha wakulima wanajua njia sahihi za kuepuka na kutibu magonjwa ya mimea na wanyama.

Amesema SUA imekuwa ikienda na wakati kwani katika kipindi hiki cha mabadiliko ya tabia nchi pamoja na kuwepo kwa maeneo machache ya kuchungia, SUA imejikita katika tafiti za malisho na tayari wafugaji wameanza kunufaika.

Amesema mbali na malisho pia SUA imejikita katika kutoa aina mbalimbali ya miche bora  ya matunda ambayo inazaa ndani ya miaka 3 na imesambazwa sehemu kubwa ya nchi

Naye Bwana Zakayo Nistan ambaye ni mfanyabiashara mdogo maarufu kama Machinga jijini Dodoma, aliyefika kujionea teknolojia zinazo onyeshwa na SUA amesema bunifu za SUA zimeleta maendeleo makubwa kwa wananchi hasa katika kuimarisha afya ya binadamu, mimea na wanyama.

Bw. Zakayo Nistan akiwa amebeba panya katika banda la SUA, panya hawa ni maalum kwa ajili ya tafiti 

Amesema utafiti na teknolojia ya kutumia Panya kutambua eneo ambalo lina mabomu ili yateguliwe na kutambua makohozi yenye vimelea vya ugonjwa wa Kifua Kikuu yaaani ‘Tuberculosis’(TB) ugonjwa ambao ni hatari na husababisha vifo.

Wakati huo huo SUA imekuja na ubunifu wa mfumo wa kidigitali unaoitwa ‘SmartTB’ unaoweza kufuatilia matibabu ya mgonjwa wa Kifua Kikuu kwa ajili ya kuhudhuria kliniki kwa wakati ili kupata matibabu na kujua taarifa za maendeleo ya afya. Hatimaye kujiweka kwenye mazingira mazuri ya kupona kabisa ugonjwa huo.

 Bi Joan Jonathan (aliyevaa miwani ) akitoa maelezo ya namna mfumo wa SmartTB unavyofanyakazi, wa pili kulia ni Prof. Lazaro Busagara Mkurugenzi Mkuu wa Tume ya Nguvu za Atomu Tanzania 

Akizungumza wakati wa maonesho ya Wiki ya Ubunifu Tanzania 2023, Mhadhiri Msaidizi kutoka Idara ya Infomatiki na Teknolojia ya Habari SUA Bi Joan Jonathan amesema mfumo huo pia unaweza kumjulisha mhudumu wa afya upande wa kifua kikuu kama kuna mgonjwa wa TB alitakiwa kufika kliniki ili kupata matibabu na hakufika ili aweze kufuatiliwa.

Amesema mfumo huu unaweza kutuma ujumbe mfupi yaani SMS kwenye namba ya simu ya mgonjwa na mhudumu wa afya ambapo mgonjwa atapata ujumbe siku moja kabla ya siku aliyopangiwa kuhudhuria kliniki. Vivyohivyo, mhudumu wa afya atapata ujumbe siku moja baada ya mgonjwa kutofika kliniki, na hii itasaidia mhudumu huyo kuwasiliana na mgonjwa ili afike kupata matibabu. Pia, SmartTB itasaidia kupunguza kuenea kwa kifua kikuu sugu na maambukizi mapya.  

Maonesho ya Wiki ya Ubunifu Tanzania yameingia siku ya 3 na yanatarajiwa kufikia kileleni Aprili 28, 2023 ambapo kauli mbiu ya maonesho hayo ni ‘Ubunifu kwa Uchumi Shindani’ 

      Picha chini ni matukio mbalimbali katika maonesho ya Wiki ya Ubunifu Tanzania