Wafanyakazi waaswa kushiriki katika michezo kukabiliana na magonjwa yasiyoambukiza

Na: Ayoub Mwigune

imeelezwa kuwa kushiriki katika mazoezi mbalimbali ya mwili huchangia kufanya mwili kuwa na afya na kuongeza ufanisi katika utendaji wa kazi kwani mazoezi husaidia kupambana na magonjwa yasiyoambukiza vilevile kuondoa mawazo yanaweza kupelekea kushiriki katika makundi na vitendo visivyofaa katika jamii.

Wito huo umetolewa na Mkurugenzi Mkuu wa Taasisi ya Utafiti wa Mifugo Tanzania (TALIRI), Prof. Erick Komba wakati wa kuhitimisha  Bonanza la  michezo  maarufu kama VC CUP  katika viunga vya  Kampasi ya Edward Moringe Morogoro ikiwa ni utaratibu wa SUA kuhakikisha wafanyakazi wa chuo hicho wanashiriki katika michezo ili kuupa mwili afya na ufanisi katika kazi kila mwaka.

 Awali Prof.  Komba amepongeza Menejimenti ya Chuo hicho kwa kuthamini michezo na kuanzisha mashindano hayo yenye lengo kuwaunganisha  wafanyakazi wote wa SUA kupitia michezo ili kufahamiana na kuondoa mawazo mabaya pamoja na kujenga afya zao.

  ‘’ Natambua kuwa lengo kuu la Taasisi ya Elimu kama hii ni Taaluma lakini  naomba  Niipongeze  sana menejimenti na uongozi wa SUA kwa kulipatia kipaumbele swala la michezo kwa wafanyakazi Chuoni hii ni hatua nzuri kwani itaongeza ufanisi na ari ya wanajumuiya wa SUA kushiriki kwenye michezo” Alissema Prof.  Komba .

 Aidha Prof.  Komba amewasihi  wafanyakazi wa Chuo hicho kuweza kuitumia  vizuri michezo  katika kuimarisha uhusiano na kubadilishana uzoefu  katika kazi kwani kupitia michezo ni rahisi  kurahisha mawasiliano huku akiongeza kusema kuwa kwa sasa michezo imekuwa ni sehemu ya ajira kwa kuweza kuajiri vijana mbalimbali huku akitolea mfano wa waamuzi waliochezesha michezo hiyo.

 Vilevile Prof.  Komba ametoa Tsh 500,000 kwa ajili ya kusaidia timu ya wafanyakazi wa SUA inayokwenda kushiriki katika mashindano ya  Shirikisho la Michezo la Mashirika ya Umma,Taasisi na Kampuni binafsi Tanzania (SHIMUTA) ambayo yameanza kufanyika Jijini Tanga leo tarehe 16 Novemba 2022 .

 Akizungumza kabla ya kumkaribisha Mgeni rasmi kufunga michezo hiyo Rasi wa ndaki ya Solomon Mahlangu Prof. Geoffrey. Karugila kwa niaba ya Makamu Mkuu wa Chuo Prof. Raphaelamesema  lengo la michezo hiyo ni sehemu ya Chuo kupata wanamichezo ambao watakiwakilisha Chuo  kwenye michezo mbalimbali ndani na nje ya nchi lakini  pia kuimarisha uhusiano wa wafanyakazi katika idara mbaimbali sambamba pamoja kujenga afya zao .

Pamoja na hayo Prof. Karugila kupitia mashindano hayo wameendelea kuboresha uhusiano na Taasisi mbalimbalimbali huku akitolea mfano wa Benki ya CRDB na Chuo hicho ambapo  benki hiyo wameendelea kuwa wadhamini wa mashindano hayo kwa muda mrefu.