MJUMITA HAKIKISHENI TANZANIA INAKUWA YA KIJANI IFIKAPO 2030

Na: Calvin Gwabara - Morogoro.

Wanachama wa Mtandao wa Jamii wa Usimamizi Shirikishi wa Misitu Tanzania MJUMITA wametakiwa kushirikiana na Serikali kwenye kampeni ya kuitunza misitu ya asili na kurejesha uoto wa asili ili kuifanya Tanzania ya kijani ifikapo mwaka 2030.

Naibu Waziri wa Maliasili na Utalii Mhe. Mary Masanja wakati akifungua Warsha na Mkutano Mkuu wa 22 wa mwaka wa MJUMITA Mkoani Morogoro.

Kauli hiyo imetolewe na Naibu Waziri wa Maliasili na Utalii Mhe. Mary Masanja wakati akifungua Warsha na Mkutano Mkuu wa 22 wa mwaka wa MJUMITA unaofanyika Mkoani Morogoro kwa lengo la kufanya tathimini ya utekelezaji na kupanga mikakati mipya ya usimamizi wa misitu nchini.

“Rais wa Jamhuri ya Muungano wa Tanzania Mhe. Samia Suluhu Hassani anapambana kuhakikisha swala la uhifadhi wa misitu na mazingira nchini linasimamiwa vizuri ndio maana kila mara amekuwa akizungumzia swala hili kila anapokwenda kuzungumza na Wananchi hivyo kwakuwa na nyinyi hapa mnatoka kanda zote nchi nchi nzima lazima tuanzishe kampeni maalualumu kuunga mkono jitihada za Rais wetu katika kupambana na mabadiliko ya Tabianchi na hii iwe Kijiji kwa Kijiji,nyumba kwa nyumba, Kitanda kwa kiatanda na shuka kwa shuka naamini haitashindwa nan chi itakuwa ya kijani tena” alisema Mhe. Masanja.

Amesema anatambua kuwa miti inafika wakati inakomaa na inafaa kuvunwa ili jamii inufaike nayo kwa kupata mazao mbalimbali lakini lazima uvunaji huo uzingatie utaalamu na uvunaji kwa uendelevu kwa faida ya kizazi hiki na kizazi kijacho.

Aidha naibu Waziri huo wa Maliasili na utalii amempongeza Mkurugenzi Mtendaji wa MJUMITA na wataalamu wake kwa kuanzisha mtandao huu ambao sasa umefikisha miaka 22 anaamini kuwa hadi itakapofika mwaka 2030 misitu yote ya Tanzania itarudi na hivyo kuwataka Washiriki wote kuondoka na dhamira kuwa wanakwenda kurudisha uoto wa Asili.

Awali Mwenyekiti wa MJUMITA Bi. Rehema Ngalekele amesema Mtandao huo ulianzishwa mwaka 2000 na kusajiliwa kama NGO mwaka 2007 na ina wanachama mitandao 120 kwenye kanda sita Tanzania bara na umeleta pamoja wanachama takribani 15,000 katika usimamizi wa misitu ya asili ipatayo hekta 1,800,000 katika vijiji zaidi ya 450 na kuboresha Maisha ya jamii kupitia shughuli mbalimbali kama vile ufugaji nyuki,Kilimo hifadhi,Miradi ya maji,ufugaji wa vipepeo, uanzishwaji wa VICOBA na kufanikisha mpango wa matumizi bora ya ardhi kwenye vijiji zaidi ya 100 huko kilosa,Lindi,Liwale,Nachingwea, Handeni na Mvomero.

Mwenyekiti wa MJUMITA Bi. Rehema Ngalekele akitoa neno la ukaribisho kwa Mgeni rasmi.

“MJUMITA tunapenda kutoa pongezi kwa Raisi wa Jamhuri ya Muungano wa Tanzania Mma yetu Mhe. Samia Suluhu Hassan kwa jitihada zake kubwa na nzuri anazozifanya kwa kupambana na janga la mabadiliko ya Tabianchi na kuhakikisha rasilimali za nchi zinalindwa na kusimamiwa kwa Madhubuti kwa maslahi ya kizazi cha sasa na kijacho”alisema Bi. Ngalekele.

Akieleza lengo la Mkutano huo Mkurugenzi Mtendaji wa MJUMITA Bi. Rahima Njaidi amesema kuwa ni kuwakutanisha wadau mbalimbali wa misitu wakiwemo Wanachama na Wananchi kutoka mikoa 13 ya Tanzania Bara kwenye Wilaya 30 na vijiji zaidi ya 450 ambao wanahifadhi misitu ya vijiji na kuivuna kwa njia endelevu.

Mkurugenzi Mtendaji wa MJUMITA Bi. Rahima Njaidi akieleza malengo ya Warsha na mkutano huo wa mwaka wa 22 wa MJUMITA.

“Kwa mwaka huu tunajaribu kuongelea zaidi swala la ushirikishi wa Wanawake na Vijana katika uhifadhi wah ii misitu lakini pia katika kukabiliana na mabadiliko ya tabianchi na makundi haya mawili mara nyingi yansahaulika ingawa yanamchango mkubwa sana katika kuendeleza sekta ya misitu” Alisema Bi. Njaidi.

Aidha amesema wapo hapo kwaajili ya kuweka mikakati Madhubuti ya kuhakikisha makundi hayo yanasihrikishwa kikamilifu katika kutunza misitu lakini pia na wao wenyewe wananufaika na ndio maana wapo na wadau mbalimbali kamavile TFCG,WWF,Plan CANTZ,FORVAC na MCDI na wengine ili kila mmoja akirudi mahali pake pa kazi akatekeelze maazimio hayo.