Si sahihi kuwapa wanyama dawa za binadamu - Prof. Mdegela

 

Gerald Lwomile

Dar es Salaam

Imeelezwa kuwa pamoja na kuwepo kwa muingiliano mkubwa wa dawa za binadamu na wanyama lakini si sahihi kwa dawa za binadamu kutumika kwa wanyama na dawa za wanyama kutumika kwa binadamu kwani ni moja ya chanzo cha usugu wa vimelea vya magonjwa.

Prof. Robinson Mdegela akisalimiana na Naibu Waziri wa Mifugo na Uvuvi Mhe. Abdallah Ulege (Picha Maktaba- Mtandao)

Hayo yamesemwa na Mhadhiri Mwandamzi kutoka Ndaki ya Tiba ya Wanyama na Sayansi za Afya katika Chuo Kikuu cha Sokoine cha Kilimo (SUA) Prof. Robinson Mdegela wakati akizungumza katika kipindi cha Malumbano ya Hoja kinachorushwa na kituo cha Televisheni cha ITV.  

Prof. Mdegela amesema viwango vya dawa vilivyowekwa mfano kwenye dawa ya ‘Tetracycline’ kwa tiba ya mnyama ni tofauti na viwango vilivyowekwa kwenye tiba ya binadamu na kuongeza kuwa dawa hizi mbali na kutibu pia zina madhara hivyo kuzitumia kinyume na zilivyopangiwa ni kuhatarisha maisha  kwa kiumbe ambacho hakikulengwa. 

“Mazoea ni mabaya, tumeshuhudia sasa hivi wafugaji wanadhani kuwa dawa ya binadamu iko kwenye kiwango kikubwa zaidi na wanadhani dawa inayotumika kutibu magonjwa ya binadamu kule inafaa kumbe hapana” amesema Prof. Mdegela.

Akizungumzia namna ya kuepuka matumzi holela ya dawa ambayo yanaweza kusababisha usugu wa vimelea vya Magonjwa Mwenyekiti wa Chama cha Wafamasia Tanzania Bw. Fadhili Hezekiah amesema zipo silaha mbili kubwa zinazoweza kutumika katika kukabiliana na hali hiyo ambazo ni elimu na usimamizi wa sharia.

Naye Bingwa wa Magonjwa ya Kuambukiza kutoka Chuo Kikuu cha Buganda (CUHAS) Prof. Jeremiah Seni amesema kuna makundi ambayo yanaweza kuathirika zaidi na usugu wa vimelea vya magonjwa kama Watoto ambao wako chini ya miaka 5 ambapo mwaka 2009 walifanya utafiti na kugundua katika watoto 100 walio chini ya mwezi mmoja Watoto 19 walifariki.

Ameyataja makundi mengine kuwa ni pamoja na wagonjwa wanaofanyiwa upasuaji, walioko katika chumba cha wagonjwa mahututi na wagonjwa wenye upungufu wa kinga mwili.

Usugu wa vimelea hutokea pale ambapo dawa iliyokuwa ikiua aina fulani ya vimelea vya magonjwa ilipotumika awali kushindwa kufanya kazi pale mgonjwa alipopata aina hiyo hiyo ya vimelea.