MRADI WA CoForEST WAWEZESHA JAMII YA KABILA LA WANGUU KUBADILI TABIA

Na: Calvin Gwabara - Mvomero.

Wakazi wa Wilaya ya Mvomero mkoani Morogoro ambao ni jamii ya kabila la Wanguu waaachana mila za ubaguzi na ukatili wa kijinsia katika ushiriki wa Wanawake kwenye majadiliani na kupanga mipango ya maendeleo baada ya elimu ya Jinsi na Jinsia iliyotolewa na Mradi wa kuhifadhi misitu kwa kuwezesha biashara endelevu ya mazao ya misitu Tanzania (CoForEST).

Bwana Ally Semwali ambaye ni mjumbe wa Serikali ya Kijiji cha Msolokelo kata ya Pemba na mtoa elimu ya masuala ya Jinsi na Jinsia.

Ushuhuda huo umetolewa na Ally Semwali ambaye ni mjumbe wa Serikali ya Kijiji cha Msolokelo kata ya Pemba na mtoa elimu ya masuala ya Jinsi na Jinsia na kuthibitishwa na Wanawake wenyewe wakati wakizungumza na waandishi wa habari kutoka vyombo mbalimbali vya habari nchini walipotembea Kijijini hapo viongozi wa Shirika la Kuhifadhi Misitu ya Asili Tanzania (TFCG) kwa kushirikiana na Mtandao wa Jamii wa Usimamizi wa Misitu Tanzania (MJUMITA) wanaotekeleza mradi huo kwa ufadhili wa Shirika la Maendeleo na ushirikiano la Uswisi (SDC) kuangalia mafanikio ya tangu ianzishwe.

Bwana Semwali amesema mfumo dume kwenye Kijiji hicho umetoweka kwa asilimi zaidi ya 75% baada ya mafunzo ya mara kwa mara ya kujengea uwezo jamii na kuwawezesha Wanawake kujiambua na kupaza sauti zao na kukataa ukandamizi kwenye kaya na jamii nzima ya kabila la Wanguu.

“Kipindi cha nyuma sisi wanguu ni vigumu sana kwa mwanamke kusimama mbele ya halaiki ya wanaume iwe kwenye mikutano ya Kijiji au familia kutoa kauli, kusikilizwa na kupewa umuhimu kwa mawazao yake, lakini baada ya elimu hali imebadilika kwa kiasi kikubwa sana maana sasa wanaongea kwenye mikutano kama hivi,wanasikilizwa, wanashiriki katika shughuli za uchomaji mkaa tena huko ndio wengi kuliko wanaume na kujipatia fedha na kupanga matumizi ya fedha wanazozipata na waume zao’’ alifafanua Bwana Semwali.

Aidha amebainisha kuwa hali hiyo pia imebadilika kwa wanaume pia maana huko nyuma kuna kazi ambazo mwaume alikuwa hawezi kuzifanya kwenye nyumba kama vile kupika,kufua na nyinginezo lakini sasa wanashiriki vizuri na hivyo kusaidiana katika kutekeelza majukumu mbalimbali ya familia na yale ya kimaendeleo.

Kwa upande wake Stamili Kisingeli mkazi wa Kijiji cha Msolokelo ambaye ni mnufaika wa Mradi na mafunzo hayo amesema kuwa wakati maafisa wa MJUMITA NA TFCG wanaanza mafunzo hayo hali ilikuwa mbaya sana wanawake waliojiona hawana thamani sana kwa jamii mbel ya wanaume lakini baada ya mradi kuanza kuwashirikisha kwenye mikutano na kuwataka kuongea jamii ikabadilika thamani yao ikaanza kuonekana.

Bi.Stamili Kisingeli mkazi wa Kijiji cha Msolokelo ambaye ni mnufaika wa Mradi na mafunzo hayo ya Jinsi na Jinsia.

“Kwahiyo tupokuwa tunashiriki mikutano na wakufunzi kuhimiza uwiano kwenye mafunzo na mikutano woga ukaanza kuisha maana kila wakija wanauliza mbona jinsi ndogo na hata nyinyi mlipofika hapa mkauliza swali hilohilo mbona jinsi ndogo? Kwahiyo tumejikuta tunazoea na wanaume wanazoea na ukiingia kwenye shughuli za mkaa wanawake ndio wengi kuliko wanaume” alifafanua Bi Kisingeli.

Aliongeza “Tuashukuru sana kwa kuja kwa huu mradi umetusaidia sana maana sasa wanawake tunajiona kabisa kuwa tunaweza kumili na tunauwezo wa kufanya kitu, kwa mfano mimi nimechoma mkaa na kufuga nyuki nimepata hela nimesomesha Watoto wangu wawili shule ya Sekondari na nimenunua ng’ombe yani tunajisikia raha kwakweli” alisema Kisingeli.

Bi. Kisingeli amesema pia kupitia biashara ya uchomaji wa Mkaa endelevu Wanawake wengi sasa wamejiunga kwenye vikundi vya kuweka na kukopa na kujipatia fedha za kuendesha Maisha yao na familia zao nah ii ni matokeo ya elimu ya jinsi na jinsia kwenye Kijiji hicho.

Mradi wa kuhifadhi misitu kwa kuwezesha biashara endelevu ya mazao ya misitu Tanzania (CoForEST) unatekelezwa na Shirika la Kuhifadhi Misitu ya Asili Tanzania (TFCG) kwa kushirikiana na Mtandao wa Jamii wa Usimamizi wa Misitu Tanzania (MJUMITA) kwa ufadhili wa Shirika la Maendeleo na ushirikiano la Uswisi (SDC).

PICHA ZA WANANCHI,MAAFISA MRADI KUTOKA MJUMITA NA TFCG PAMOJA NA WAANDISHI WA HABARI WALIOSHIRIKI KWENYE MKUTANO HUO.