Kutumia muda vizuri, nidhamu na kujitolea katika masomo ni njia ya kufikia malengo - Dkt. Nyambilila

 

Na Gerald Lwomile

Kibaoni - Mpimbwe

Wanafunzi wa Chuo Kikuu cha Sokoine cha Kilimo (SUA) wametakiwa kutumia muda wao vizuri, kujiheshimu kuwa na nidhamu na kuhakikisha wanajitolea katika masomo wakati wote jambo litakalowasaidia kufikia malengo au ndoto zao.

Wanafunzi wa Kampasi ya Mizengo Pinda wakiwa katika Picha ya pamoja na Makamu Mkuu wa Chuo Kikuu cha Sokoine cha Kilimo Prof. Raphael Chibunda (aliyevaa miwani katikati) wa pili kutoka kushoto (waliokaa) ni Dkt. Nyambilila Amuri Mkurugenzi wa Kurugenzi ya Shahada za Awali SUA

Hayo yamesemwa na Mkurugenzi wa Kurugenzi ya Shahada za Awali kutoka SUA Dkt. Nyambilila Amuri wakati akizungumza na wanafunzi wa Kampasi ya Mizengo Pinda iliyopo wilaya Mpimbwe Mkoani Katavi wakati wa ziara ya Makamu Mkuu wa Chuo Kikuu cha Sokoine cha Kilimo Prof. Raphael Chibunda.

Dkt. Nyambilila amesema wakati mwingine vijana wengi wameshindwa kufikia malengo yao kutokana na kushindwa kukubali kufuata miongozo na kanuni za mahali husika na kujikuta wakifanya mambo ambayo huwapotezea muda ikiwa na pamoja na kujiingiza katika makundi hatarishi.

Amesema masomo ambayo mwanafunzi amekuja kusoma katika Chuo hicho ni mwanzo muhimu wa kutengeneza kesho yake ikiwa ni pamoja na kujijengea uwezo wa kutatua changamoto mbalimbali zinamzunguka akitumia elimu aliyoipata.

Wanafunzi wa Kampasi ya Mizengo Pinda wakimsikiliza Dkt. Nyambilila (hayupo pichani) wakati akizungumza na wanafunzi hao

Mkurugenzi huyo katika Kurugenzi ya Shahada za Awali amesema, endapo mwanafunzi atayachukulia kwa umuhimu unaostahili masomo yake basi taifa litajenga wataalamu wazuri ikiwa ni pamoja na wanasayansi vijana mahili.

Katika hatua nyingine Dkt. Nyambilila amesema Kurugenzi ya Shahada za Awali, Wanataaluma na Menejimenti ya Chuo hicho itahakikisha inatoa ushirikiano wa kutosha na kuwawezesha wanafunzi kuhakikisha wanapata kile kilichowaleta chuoni hapo ambacho ni elimu na maarifa katika fani walizozichagua.

Amesema, katika kuhakikisha wanafunzi wanafikia malengo yao watahakikisha wanaendelea kuboresha mazingira ya mwanafunzi kujifunzia katika Kampasi zote na kuhakikisha wanatoa ushauri kwa wanafunzi kuhusiana na shahada mbalimbali walizochagua.