Wanafunzi Mwaka wa Kwanza wa Shahada za Awali SUA watakiwa kukamilisha hatua zinazohitajika ili kukamilisha Usajili kwa wakati

 

Na: Ayoub Mwigune

Wanafunzi wote wa mwaka wa kwanza wa Shahada za Awali katika Chuo Kikuu cha Sokoine cha Kilimo (SUA) wametakiwa kukamilisha hatua zote zinazohitajika ili kukamilisha Usajili kwa wakati ndani ya siku saba za usajili zilizopangwa kuanzia 24 Oktoba, 2022 kwa ajili ya kuanza masomo kwa muhula mpya wa masomo kwa mwaka unaoanza Oktoba 31, 2022.

Amebainisha hayo Mkurugenzi wa Shahada za Awali Dkt. Nyambilila Amuri wakati akizungumza na SUAMEDIA Oktoba 25, 2022 kuhusiana na vitu vya kuzingatia ili kukamilisha Usajili wa wanafunzi wa mwaka wa kwanza kwa Shahaza za Awali unaoendelea chuoni hapo.

Amesema mwamko wa wanafunzi katika zoezi la Usajili litakalochukua muda wa siku saba ambalo lilianza Oktoba 24, 2022 ni mzuri   ukilinganisha na kipindi kilichopita kwani wanafunzi wameripoti kwa wakati hata hivyo Usajili bado unaendelea kwa kuwa si wote waliodahiliwa wamemaliza usajili ndio maana wanafunzi wanasisitizwa kukamilisha hatua zote zinazohitajika ili kukamilisha usajili kwa wakati.

Dkt. Nyambilila amesema ni muhimu mwanafunzi kuzingatia muda uliopangwa kwa ajili ya Usajili kwa kuwa akikosa zoezi hilo atashindwa kufahamu vitu vya msingi ikiwemo kufahamu mazingira ya Chuo, kupata  mafunzo mbalimbali yatakayotolewa na Wakuu wa Idara mfano kuhusu Afya, kujua jinsi ya kujitambua ili kuweza kuishi maisha ya ushindi pindi wawapo chuoni.

“Kwa wanafunzi ambao wameshafika Chuoni lakini bado hawajasajiliwa wanaweza kuendelea kujisajili kwa kuingia kwenye akaunti zao ambazo wameombea maombi watakutana na kitufe cha register atabonyeza hapo na kuhakiki taarifa zake zote hata zile za ziada na kuendelea na hatua zitakazofuata ili aweze kukamilisha usajili,” amesema Dkt. Nyambilila.

Kwa upande wake Datius Raphael mwanafunzi wa Mwaka wa Kwanza SUA amesema Chuo kimejipanga vizuri kuanzia upande wa mapokezi kwani wanafunzi wamepokewa vizuri na wamefurahia huduma hiyo.

Akizungumzia Usajili kwa njia ya mtandao mwanafunzi huyo amesema njia hiyo imerahisisha kazi na kufanya wanafunzi kusajiliwa kwa wakati hivyo kuepusha msongamano.