Mradi wa kuendeleza Kilimo Safu za Milima ya Uluguru UMADEP waleta neema kwa wakulima Mgeta

Na.Vedasto Gerorge.

Miradi ya Kilimo inayoanzishwa na Chuo Kikuu Cha Sokoine cha Kilimo SUA ikiwemo Mradi wa kuendeleza Kilimo safu za Milima ya Uluguru (UMADEP)    imeendelea kuleta mafanikio kwa Wakulima ambapo wameendelea kuzalisha mazao kwa tija na yenye ubora baada ya kupatiwa Mafunzo na Teknolojia za kisasa kuhusu uzalishaji wa mazao ya chakula yakiwemo ya Mboga mboga na Matunda.

Wakizungumza na SUAMEDIA Wakulima wanaojishugulisha na kilimo cha mazao mbalimbali akiwemo Semfilian Mahenge kutoka Kijiji cha Ndugutu na Teresia Bonifasi wa kijiji cha Nyandira kata ya Nyandira Tarafa ya Mgeta wilaya ya Mvomero mkoani Morogoro wamesema tangu kuanzishwa kwa Mradi wa  Kilimo kwenye Milima ya Urugulu (UMADEP) mwaka 1998  umeleta mabadiliko makubwa ya kiuchumi kwenye familia zao.

“Huu Mradi tangu umekuja miaka ya tisini kiukweli ulikuja na mambo matatu kwanza Mradi ulifanya tafiti  za mazao ya mboga mboga na matunda na tulipewa mbegu bora za kilimo   kupitia Mradi huo yakiwemo Mafunzo ya Ufugaji wa Mbuzi wa maziwa,  tunakishukuru Chuo Kikuu cha Sokoine cha Kilimo SUA kwa miradi wanayotuletea kwa kweli Mgeta tumenufaika sana na mradi huu wa UMADEP”, wamesema wanakijiji hao.

Aidha wamesema Mradi huo wa UMADEP uliwezesha upatikanaji wa soko la mazao mbalimbali ikiwemo kuweka miundombinu ya barabara ili kuwawezesha wakulima waliopo katika Kata tatu za Tarafa ya Mgeta kuweza kusafirisha mazao yao.

Pia wamesema kabla ya ujio wa Mradi huo wa UMADEP katika Tarafa hiyo hali zao za maisha zilikuwa duni kutokana na  kutopata elimu juu ya ulimaji wa mazao kwenye safu za Milima ya Urugulu ambapo walikuwa wakilima kwa mazoea hali iliyopelekea Wakulima kuwa duni.

“Kiukweli kabla ya Mradi huu kuja Mgeta maisha yetu yalikuwa ya chini kabisa kwa sababu tulizoea kufanya kilimo kisichokuwa na tija mazao yetu yalikuwa ya kawaida na tulikosa mahala pa kuyauza, SUA tunawashukuru sana Miradi kama hii tunaomba  iendelee kuja kwetu”, amesema Semfilian  Mahenge  Mkazi wa kijiji cha Ndugutu.

Kwa upande wake Msimamizi wa Kituo cha Kilimo na Wakulima Mgeta William Shekilango kutoka Ndaki ya Kilimo, Idara ya Ugani  na Maendeleo ya Jamii SUA amesema mpaka sasa Mradi huo wa UMADEP unahudumia vijiji 28  vilivyopo katika kata tatu za Tarafa ya Mgeta  wilayani Mvomero Mkoani Morogoro.

“Mradi umewawezesha Wakulima kupata mafunzo ya kuweza kulima  kilimo cha mboga mboga na matunda Chuo kiliweza kuwasafirisha wakulima kwenda mikoa mingine ambapo kule walijifunza zaidi namna ya kulima mazao mbalimbali na walipo rudi kiukweli walianza kulima wenyewe na sasa wanaendeleza kile walichojifunza juu ya kilimo”,  amesema Msimamizi huyo.

Pia Shekilango amesema licha ya kukuta shughuli za kilimo milimani zikiwa zinaendelea lakini wakulima walio wengi hawakujua namna ya kufanya kilimo hicho ambapo mazao yao yalikuwa yakisombwa na maporomoko ya maji na kujikuta wakipata mazao machache kutoka  mashambani.

Ameongeza kuwa kwa sasa wakulima wengi wanajua nini wanachokifanya “kiukweli SUA naweza kusema kwenye Mradi huu wa UMADEP tumefanikiwa kwa asilimia 100, sasa wanavuna mazao mengi na ukiangalia Wakulima wengi wameweza kusomesha watoto, kujenga majumba  hivi vyote vimetokana na uwepo wa Mradi ambao ulikuwa unasimamiwa na SUA”.

 

“Chuo kimefanikiwa kuwatoa Wakulima kwenye kilimo cha mazoea na sasa wanalima kwa tija  na kimsingi Chuo Kikuu cha Sokoine cha Kilimo SUA kinatoa mafunzo na kimeweza kuwa karibu na Wakulima  wa Tarafa  hii ya Mgeta na wamenufaika zaidi”, amesema Shekilango.

 

KATIKA VIDEO: BOFYA HAPA CHINI, USISAHAU KUSBSCRIBE CHANNEL YETU NA KULIKE VIDEO